کارسپانڈنٹ ڈنر کی روایت انیس سو چوبیس میں شروع ہوئی تھی اور آج تک جاری ہے

دلچسپ بات یہ ہے کہ صدر بش نے اس سالانہ ڈنر میں اپنی نقالی کے لیئے ’اپنے ہم زاد‘ سٹیو برجز کو خود مدعو کیا تھا۔ اور سٹیو نے حاضرین کو اپنے فن سے خوب محظوظ بھی کیا۔ سٹیو ٹیلی وژن پر صدر بش کی نقالی کرتے ہیں۔

’چلیں شروع کریں ورنہ میں سونے کے لیئے نہیں جا سکوں گا‘ سٹیو نے اس جملے سے صدر بش کی نقل کرنی شروع کی۔ بس پھر کیا تھا ہر طرف قہقہوں کا آغاز ہوگیا۔

اصلی صدر نے اپنی تقریر میں اپنے ایجنڈے کو عالمی سطح پر ترویج دینے کی بات کی۔

سٹیو نے صدر بش کے لب و لہجے میں کہا: ’ٹھیک ہے۔ اطمینان کیجیئے۔ دھیرے دھیرے ایسا کرنے کی کوشش کرتے ہیں۔ باتوں کی نسبت یہ سٹیو کی عمدہ فنکاری تھی جس کے نتیجے میں انہوں نے ہر جملہ ویسے ہی بولا جیسے صدر بش بولا کرتے ہیں۔

صدر بش کے انداز کو اپناتے ہوئے سٹیو برجز نے مہمانوں سے خطاب کرتے ہوئے کہا: ’عالمی برادری میں میرے کچھ ناقدین مجھے مغرور کہتے ہیں۔ لیکن میں ان کی کسی بات پر کوئی ردِ عمل ظاہر نہیں کروں گا کہ کہیں ان کی شان نہ بڑھ جائے۔‘ جب سٹیو یہ جملے بول رہے تھے تو پاس بیٹھے صدر بش ہنس رہے تھے۔

صدر جارج بش نے اپنے خطاب میں کہا: ’مت پوچھیئے کہ یہاں موجودگی سے مجھے اور لورا کتنا لطف آیا۔فوراً ہی سٹیو نے جگت لگائی: ’لورا بہت ہاٹ ہیں۔‘

امریکی نامہ نگاروں کے لیئے سالانہ ڈنر کی روایت سابق امریکی صدر کیلوِن کولِج نے انیس سو چوبیس میں شروع کی تھی جو آج تک جاری ہے۔ اس ڈنر میں صحافیوں کے علاوہ سیاست دان اور مشہور شخصیات بھی شریک ہوتی ہیں۔