ایلن جونسٹن بی بی سی نیوز، غزہ

	ہمیں روزانہ ایک لاکھ بیس ہزار ڈالر کا خسارہ ہورہا ہے: جابر

فلسطین کے اس غریب علاقے میں مرچوں کی کاشت پیسہ کمانے کا اہم ذریعہ ہے۔ اور اب دھوپ میں چمکتی یہ تازہ مرچیں جو پہلے یورپ کی سپر مارکیٹوں میں بھاری دام پر ہاتھوں ہاتھ بک جایا کرتی تھیں، بکریوں کی خوراک بن رہی ہیں۔

وجہ یہ ہے کہ اسرائیل نے غزہ کے تجارتی رستے بند کردیئے ہیں۔

غزہ کی فصل کو باہر جانے دیا جائے، فلسطینیوں کو زندہ رہنے دیا جائے۔ باصل جابر

غزہ آنے اور جانے والی ہر چیز اسرائیل کے ساتھ سرحد پر واقع بڑے کارگو ٹرمینل کارنی سے گزرتی ہے تاہم پچھلے تین ماہ سے اسے بند کردیا گیا ہے۔

	غزہ

اسرائیل کا کہنا ہے کہ سکیورٹی خدشات کے باعث ایسا کیا گیا ہے۔ فلسطین کا کہنا ہے کہ اسرائیل کے ساتھ معاہدے کے مطابق کارنی کو کھولا جائے۔

یہ تنازعہ کافی عرصے سے جاری ہے اور غزہ کی گرتی ہوئی معیشت کے لیئے مزید نقصان کا باعث بھی۔ سب سے زیادہ نقصان سبزیوں کی برآمد کو پہنچا ہے۔

یہ سبزیاں ان گرین ہاؤسز میں کاشت کی جاتی ہیں جو یہودی آباد کاروں کے انخلا کے بعد فلسطینیوں کے حصے میں آئے ہیں اور جو اس غریب علاقے کی قسمت بدل سکتے ہیں لیکن تجارتی رستوں کی بندش ایسا نہیں ہونے دے رہی۔

فلسطینیوں کا کہنا ہے کہ اسرائیل جان بوجھ کر غزہ کو تباہ حالی کی طرف لے جانا چاہتا ہے اور تجارتی رستے بند کرنے کا اقدام سکیورٹی کے لیئے نہیں بلکہ اس کی سیاسی وجوہات ہیں۔

باصل جابر کا کہنا ہے کہ بین الاقوامی برادری کو چاہیئے کہ وہ اسرائیل پر تجارتی گزرگاہ کھولنے کے لیئے زور ڈالے۔ ’غزہ کی فصل کو باہر جانے دیا جائے، فلسطینیوں کو زندہ رہنے دیا جائے‘۔