’ آئی اے ای اے یہ تصدیق نہیں کرسکتا کہ ایران کے جوہری پروگرام کا مقصد ہتھیاروں کی تیاری نہیں ہے‘

امریکہ اقوام متحدہ پر زور دے رہا ہے کہ ایران کو متنبہ کیا جائے کہ اگر اس نے اپنا جوہری پروگرام نہ روکا تو اسے اس کے ’نتائج‘ بھگتنا ہوں گے۔

ایران نے ایک سخت بیان میں کہا ہے کہ ’امریکہ نقصان اور تکلیف پہنچانے کا اہل ہے۔ اگر امریکہ یہی رستہ چننے کی خواہش رکھتا ہے تو ایسے ہی صحیح‘۔

توقع ہے کہ سلامتی کونسل اگلے ہفتے سے ایران کے معاملے پر بات چحت شروع کرے گی۔

سلامتی کونسل کے پاس ایران پر پابندیاں عائد کرنے کا اختیار ہے تاہم ابھی یہ واضح نہیں ہے کہ آیا اس کے اہم ارکان اس حق میں بھی ہیں یا نہیں۔

ایران کا رویہ بدستور باغیانہ ہے۔ صدر محمود احمدی نژاد کا کہنا ہے کہ ’ہم کسی دباؤ کے آگے سر خم نہیں کریں گے‘۔

جوہری توانائی کے ادارے آئی اے ای اے کے ایرانی مندوب جاوید ویدی نے کہا ہے کہ ان کا ملک تیل کی برآمد بند کرسکتا ہے تاہم ابھی اس بارے میں فیصلہ نہیں کیا گیا ہے۔

’امریکہ اہل ہے‘  امریکہ نقصان اور تکلیف پہنچانے کا اہل ہے۔ اگر امریکہ یہی رستہ چننے کی خواہش رکھتا ہے تو ایسے ہی صحیح۔ ایران

ایران کے بارے می بیانات میں تیزی آئی اے ای اے کے سربراہ محمود البرادعی کی رپورٹ کے بعد آئی ہے، جو ایران کے جوہری پروگرام سے متعلق ہے۔

رپورٹ کے مطابق آئی اے ای اے یہ تصدیق نہیں کرسکتا کہ ایران کے جوہری پروگرام کا مقصد ہتھیاروں کی تیاری نہیں ہے۔

اس سے قبل یورینیم کی کچھ مقدار افزدہ کرنے کی ایرانی پیشکش روس و امریکہ نے مسترد کر دی ہے۔ ایران کا یہ پیشکش کی گئی تھی کہ وہ یورینیم افزودہ کرنے کا عمل یا جوہری ایندھن روس میں افزودہ اور درآمد کرے۔

روس کے وزیرِخارجہ سرگئی لاوروف اور امریکی وزیرخارجہ کونڈی لیزا رائس نے واشنگٹن میں ملاقات کے بعد جاری کیے جانے والے مشترکہ بیان میں کہا کہ دونوں ممالک کے لیے ایرانی تجویز ناقابلِ قبول ہے۔

روسی وزیرخارجہ نے کہا ہے کہ ایران کو اپنی سرزمین پی یورینیم افزودہ کرنے کی اجازت صرف اسی صورت میں دی جا سکتی ہے کہ ایران آئی اے ای اے کی شرائط پر پوری طرح عمل کرے۔

انہوں نے کہا کہ ایران سے کوئی سمجھوتہ صرف اسی صورت میں ہو سکتا ہے کہ وہ آئی اے ای اے کے کردار کو پوری طرح قبول کرے۔

اس سے پہلے امریکی نائب صدر ڈک چینی نے ایران کو دھمکی دی تھی کہ اگر وہ اپنے جوہری پروگرام کے بارے میں عالمی دباؤ مسترد کرتا رہے گا تو اسے اس کے کڑے نتائج بھگتنا ہوں گے۔