’جوہری معاملہ سلامتی کونسل کو بھیجا گیا تو افزودگی شروع کریں گے‘

جوہری معاملات پر ایران کے مذاکرات کار علی لاریجانی کا کہنا ہے کہ ’اگر امریکہ اور اس کے اتحادی طاقت کا استعمال کرنا چاہتے ہیں تو ایران اپنا راستہ الگ کر لے گا‘۔

ان کا یہ بیان ویانا میں اقوام ِ متحدہ کے جوہری ادارے ’ آئی اے ای اے‘ کے اجلاس کے ایک دن قبل سامنے آیا ہے۔ اس اجلاس میں ایران پر ادارے کے سربراہ محمد البراعی کی ایک رپورٹ پر غور کیا جائے گا۔ اطلاعات کے مطابق اس رپورٹ میں کہا گیا ہے کہ ایران نے سنٹریفیوجز کو یورینیم گیس کی فراہمی شروع کر دی ہے۔ یہ عمل جوہری بم بنانے یا جوہری ری ایکٹروں کو ایندھن کی فراہمی کے عمل کا پہلا قدم ہے۔

علی لاریجانی نے تہران میں ایک نیوز کانفرنس سے خطاب کرتے ہوئے کہا کہ ’اگر ایران کا جوہری معاملہ سلامتی کونسل کو بھیجا گیا تو یورینیم کی افزودگی شروع کر دی جائے گی۔‘

	تیل کی قیمتوں کو بطور ہتھیار استعمال کرنے کا ارادہ نہیں:لاریجانی

انہوں نے کہا کہ ’سلامتی کونسل میں اس معاملے کے جانے کی صورت میں ایران کی تحقیق اور ترقی میں کمی نہیں آئے گی‘۔

علی لاریجانی کا یہ بھی کہنا تھا کہ ایران تیل کی قیمتوں کو مغرب کے خلاف بطور ہتھیار استعمال کرنے کا ارادہ نہیں رکھتا۔ تاہم انہوں نے خبردار کیا کہ اگر ایران کے خلاف کوئی بھی کارروائی کی گئی تو عالمی منڈی میں تیل کی قیمتیں ضروت متاثر ہوں گی۔

ادھر ایران کے ایٹمی تنازعے پر آئی اے ای اے کے اجلاس کے ایک روز قبل روسی صدر ولادیمیر پوتِن اور انڈیا کے وزیراعظم منموہن سنگھ نے بھی بات چیت کی ہے۔ اطلاعات کے مطابق بھارتی رہنما نے ایران کے ایٹمی تنازعے پر روس کی سفارتی کوششوں کی بھی تعریف کی ہے۔

عالمی امور پر بی بی سی کے نمائندے پال رینالڈز کا کہنا ہے کہ ابھی ایران پر پابندیاں لگنے کا کوئی امکان نہیں اور شاید یہ پابندیاں نہ ہی لگیں۔ ان کا کہنا ہے کہ سب سے پہلے ایران کو تنبیہ کی جائے گی اور اس سے جوہری سرگرمیاں معطل کرنے کا مطالبہ کیا جائے گا۔

یاد رہے کہ ویٹو پاور رکھنے والے دو ممالک روس اور چین فی الحال ایران پر پابندیاں لگانے کے حق میں نہیں ہیں۔