سنی اور شیعہ رہنماؤں نےکشیدگی کم کرنے کے لیے ایک منصوبہ تیار کیا ہے

ابتدائی اطلاعات کے مطابق اس حملے میں دو افراد زخمی ہوئے ہیں۔ عراق میں تشدد کی لہر اتوار کو جاری رہی اور بغداد کے جنوب میں ایک بس سٹاپ پر دھماکے میں کئی لوگ ہلاک ہوئے۔

دریں اثناء ملک کے سیاستدان فرقہ وارنہ کشیدگی کو کم کرنے اور نئی حکومت کے قیام کے لیے اتفاق رائے پیدا کرنے کی کوشش کر رہے ہیں۔

سامراء میں بدھ کے روز روضۂ عسکری پر حملے کے بعد ملک میں فرقہ وارانہ فسادات شروع ہو گئے جن میں ایک سو سے زیادہ افراد ہلاک ہوئے تھے۔

فسادات کے بعد بغداد میں کرفیو نافذ کیا گیا تھا جو اتوار کو اٹھا لیا گیا لیکن ٹریفک پر پابندی برقرار تھی۔

ایک اعلیٰ سنی سیاستدان نے بی بی سی کو بتایا کہ سنی اور شیعہ رہنماؤں نے کشیدگی کم کرنے کے لیے ایک منصوبہ تیار کیا ہے۔

عراق میں عراقی فرنٹ فار نیشنل ڈائیلاگ کے سربراہ نے بی بی سی کو بتایا کہ نئے منصوبے کے تحت وزارت داخلہ کی شیعہ اکثریت والی پولیس اور دیگر دستوں کو حساس سنُُّی علاقوں سے ہٹا لیا جائے گا اور ان کی جگہ عراقی اور بین الاقوامی فوج تعینات کی جائے گی۔

بغداد میں بی بی سی کے ایک نامہ نگار نے کہا کہ لوگ پر امید ہیں کہ سیاستدان تشدد کو روک کر ایک مخلوط حکومت قائم کرنے میں کامیاب ہو جائیں گے۔