ذوالفقار علی بی بی سی اردو، ڈاٹ کام، مظفرآباد

	’پیغمر اسلام حضرت محمد کی توہین انسانیت کے خلاف جرم ہے‘ ایک احتجاجی بینر

مظاہرین مطالبہ کر رہے تھے کہ ذمہ داروں کو سزا دی جائے ۔ مظاہرے پرامن طور پر ختم ہوئے ۔ پولیس کا کہنا ہے ان مظاہروں کے بعد متاثرہ علاقوں میں امدادی کام کرنے والے اقوام متحدہ اور دیگر بین الااقوامی اداروں کے لیے حفاظتی انتظامات سخت کردیے گئے ہیں ۔

پیغمر اسلام کے بارے میں کارٹون کی اشاعت کے خلاف وکیلوں اور طلبہ نے مظفرآباد میں الگ الگ مظاہرے کیے۔ ان مظاہروں میں چند سو افراد نے شرکت کی۔ مظاہرین کارٹون کی اشاعت کے خلاف شدید نعرے بازی کررہے تھے۔ مظاہرین نے بینرز بھی اٹھا رکھے تھے۔ ایک بینر جو وکیلوں نے اٹھارکھا تھا اس پر انگریزی میں درج تھا پیغمر اسلام حضرت محمد کی توہین انسانیت کے خلاف جرم ہے۔

مظاہرین کہہ رہے تھے کہ ان کارٹونوں کی وجہ سے پوری دینا میں مسلمانوں کے احساسات اور جذبات کو ٹھیس پہنچی ہے اور اس کے ذمہ دار لوگوں کو سزا دی جائے۔ انہوں نے مطالبہ کیا کہ حکومت پاکستان ان یورپی ممالک کے سفارتکاروں کو ملک سے نکال دے جن ممالک میں اخبارات نے یہ کارٹون چھاپے ہیں اور یہ کہ پاکستان بھی ان ممالک سے اپنے سفارت کار واپس بلائے۔ انہوں نے یہ بھی مطالبہ کیا کہ ان ممالک کے ساتھ تجارت اسوقت تک معطل کی جائے جب تک ذمہ داروں کے خلاف کارروائی نہیں کی جاتی۔

کچھ مظاہرین پاکستانی حکومت پر اس لیے برہم تھے کہ وہ اس واقع پر خاموش ہے۔

	کارٹون کی اشاعت کے خلاف وکیلوں اور طلبہ نے مظفرآباد میں الگ الگ مظاہرے کیے

پاکستان کے زیر انتظام کشمیر میں پولیس کا کہنا ہے کہ زلزے سے متاثرہ علاقوں میں کام کرنے والے اقوام متحدہ اور دیگر بین الااقوامی اداروں کی سکیورٹی بڑھا دی گئی ہے۔

کشمیر کے اس علاقے کے انسپکڑ جنرل پولیس شاہد حسن نے کہا کشمیر کا یہ علاقہ پرامن علاقہ ہے اور میرے خیال میں ان کے لیے کوئی خطرہ نہیں ہے۔ انسپکڑ جنرل پولیس کا کہنا تھا کہ مظاہروں کے بعد احتیاطی تدابیر کے طور پر ہم نے ان اداروں کی سکیورٹی میں اضافہ کیا ہے۔

مظفرآباد میں پیر کو بھی طلباء نے مظاہرہ کیا تھا جس میں ڈنمارک کے وزیراعظم کا پتلا جلایا گیا۔ اسلام میں اللہ اور پیغمر اسلام کی تصویر بنانے اور ان کو شائع کرنے کی سخت ممانعت ہے۔