تاہم حامد کرزئی نے خبر رساں ادارے اے پی کو بتایا کہ انہیں یہ توقع نہیں ہے کہ ملا عمر اپنی روپوشی ختم کرکے سامنے آئیں گے۔ انہوں نے کہا ’اگر ملا عمر سامنے آنا چاہیں تو انہیں ہم سے رابطے میں رہنا چاہیے۔ ہم دیکھیں گے کہ وہ کیا کہنا چاہتے ہیں۔‘

افغان صدر نے ملا عمر سے بات چیت کی پیشکش تو کی ہے لیکن ساتھ ہی یہ بھی کہا ہے کہ طالبان کے سربراہ کو اپنے اعمال کے لیے جواب دہ ہونا پڑے گا۔ حامد کرزئی نے یہ بھی کہا کہ طالبان کے وہ لوگ جو افغان حکومت کے ساتھ بات چیت میں شریک ہونا چاہتے ہیں انہیں خوش آمدید کہا جائے گا۔

گزشتہ سال مئی میں طالبان کے ایک ترجمان نے کہا تھا کہ ملا عمر معافی کی کسی بھی پیشکش کو مسترد کر دیں گے۔ اس زمانے میں ایک مصالحتی کمیٹی نے اس قسم کی ایک پیشکش کی تھی جس کے جواب میں ملا عمر کے ترجمان کا ردِ عمل سامنے آیا تھا۔

افغانستان میں اب تک کی پیش رفت کے مطابق سینکڑوں کی تعداد میں طالبان جنگجو اور ان کے حامی مصالحت کے عمل میں شریک ہو چکے ہیں۔ ان میں طالبان کے کئی سینئر کمانڈر اور سیاسی رہنما شامل جنہیں سخت گیر تحریک سے علیحدہ ہونا پڑا اور جس کے جواب میں انہیں سیاسی عمل میں حصہ لینے کا موقع دیا گیا۔

افغان صدر نے کہا کہ بیرونی مافیا کے گروہ مقامی مسلح انتہا پسندوں کے ساتھ مل کر ملک میں منشیات کی پیداوار کر رہے ہیں۔ حامد کرزئی نے کہا کہ یہ افراد مقامی کاشت کاروں کو ڈرا دھمکا کر افیون کی کاشت پر مجبور کر رہے ہیں۔

’ہمارے پاس اس طرح کی خبریں ہیں کہ کئی مسلمان ممالک سمیت دنیا کے کئی دیگر ملکوں سے ڈرگ مافیا کے لوگ یہاں آ رہے ہیں اور یہاں کے لوگوں کو افیون کی کاشت پر مجبور کر رہے ہیں۔ تاہم ہمیں ہر محاذ پر اس کا مقابلہ کرنا ہے۔ افغانستان کو منشیات کا مقابلہ کرنا ہے ورنہ ہم ایک آزاد قومی ریاست کے طور پر زندہ نہیں رہ سکیں گے۔‘