اسارائیلی اہلکار فلسطینی رہنما حنان اشراوی کا مشرقی بیت المقدس میں انتخابی مہم سے منع کر رہا ہے

فلسطینیوں نے منگل کو مذکورہ انتخابات کے لیے مشرقی بیت المقدس میں انتخابی مہم شروع کرنے کی کوشش کی لیکن اسرائیلی پولیس اہلکاروں نے فلسطینی رہنماؤں کو روک دیا۔

نئے فلسطینی پارلیمان کے انتخاب کے لیے پچیس جنوری کو ہونے والے الیکشن کے سلسلے میں انتخابی مہم کا آغاز ہو گیا ہے۔

فلسطینی رہنما محمود عباس دو روز کہا تھا کہ اگر اسرائیل نے مشرقی یروشلم کے فلسطینیوں کو ووٹ ڈالنے کی اجازت نہیں دی تو وہ انتخابات ملتوی کر دیں گے۔

اسرائیلی اہلکاروں نے حنان اشراوی اور مصطفیٰ برغوثی کو کہا کہ اسرائیلی قانون کے مطابق کسی فلسطینی کو مشرقی بیت المقدس میں سیاسی سرگرمیوں کی اجازت نہیں دی جا سکتی۔

انتخابات کی ممکنہ تاریخ میں صرف تین ہفتے باقی رہ گئے ہیں لیکن صورتحال اب بھی واضح نہیں ہو سکی ہے کہ آیا یہ انتخابات منعقد ہوں گے بھی یا نہیں۔

اسرائیلی حکومت نے اب تک مشرقی یروشلم کے فلسطینیوں کو حقِ رائے دہی استعمال کرنے کی اجازت نہیں دی ہے۔

’الفتح‘ کو ان انتخابات میں شدت پسند تنظیم حماس سے سخت سیاسی مقابلے کا سامنا ہے۔ حماس پہلی مرتبہ پارلیمانی انتخابات میں حصہ لے رہی ہے۔

الفتح کے مخالفین کا کہنا ہے کہ ’فتح‘ کو انتخابات میں شکست کا خطرہ ہے اور اس کے رہنما خود چاہتے ہیں کہ انتخابات میں تاخیر ہو۔

الفتح نے ان الزامات کی تردید کی ہے اور کہا ہے کہ وہ اس ماہ انتخابات کے انعقاد کے وعدے پر قائم ہے بشرطیکہ اسرائیل مشرقی یروشلم کے فلسطینیوں کو ووٹ ڈالنے کی اجازت دے دے۔

اسرائیل کا کہنا ہے کہ مشرقی یروشلم میں فلسطینیوں کو ووٹ ڈالنے کی اجازت دینے اور انتخابی مہم سے حماس کی طاقت میں اضافہ ہو گا اور وہ اس کے حق میں نہیں۔