مقامی آبادی میں انتخابات کے حوالے سے جوش و خروش پایا جاتا ہے

تاہم یہ مہم فلسطینی رہنما محمود عباس کے اس بیان سے دھندلا سی گئی ہے کہ اگر اسرائیل نے مشرقی یروشلم کے فلسطینیوں کو ووٹ ڈالنے کی اجازت نہیں دی تو وہ انتخابات ملتوی کر دیں گے۔

اگر یہ انتخابات منعقد ہوتے ہیں تو یہ فلسطینی علاقوں میں گزشتہ دس برس کے دوران ہونے والے پہلے پارلیمانی انتخابات ہوں گے۔ مقامی افراد میں ان انتخابات کے حوالے سے خاصا جوش وخروش پایا جا تا ہے۔

انتخابات کی ممکنہ تاریخ میں صرف تین ہفتے باقی رہ گئے ہیں لیکن صورتحال اب بھی واضح نہیں ہو سکی ہے کہ آیا یہ انتخابات منعقد ہوں گے بھی یا نہیں۔ اسرائیلی حکومت نے اب تک مشرقی یروشلم کے فلسطینیوں کو حقِ رائے دہی استعمال کرنے کی اجازت نہیں دی ہے۔ آج صبح بھی اسرائیلی پولیس نے ایک فلسطینی جماعت کے دو کارکنوں کو اس علاقے میں انتخابی مہم چلانے سے روک دیا۔

دریں اثناء اہم فلسطینی جماعتوں نے اپنی انتخابی مہم شروع کردی ہے۔ حکمراں جماعت ’الفتح‘ نے اپنی انتخابی مہم کا آغاز فلسطین کے مرحوم رہنما یاسر عرفات کی قبر پر ایک سادہ تقریب میں کیا۔

’الفتح‘ کو ان انتخابات میں شدت پسند تنظیم حماس سے سخت سیاسی مقابلے کا سامنا ہے۔ حماس پہلی مرتبہ پارلیمانی انتخابات میں حصہ لے رہی ہے۔

الفتح کے مخالفین کا کہنا ہے کہ ’فتح‘ کو انتخابات میں شکست کا خطرہ ہے اور اس کے رہنما خود چاہتے ہیں کہ انتخابات میں تاخیر ہو۔ تاہم تنظیم کے ایک اہم رہنما نے ان الزامات کی تردید کی ہے اور کہا ہے کہ الفتح اس ماہ انتخابات کے انعقاد کے وعدے پر قائم ہے بشرطیکہ اسرائیل مشرقی یروشلم کے فلسطینیوں کو ووٹ ڈالنے کی اجازت دے دے۔