اسرائیلی فوج نے کہا کہ اس نے اسلامی جہاد کے ’دہشتگرد‘ کو نشانہ بنایا

ہلاک ہونے والوں میں سے ایک اسلامی جہاد کے سینئر رکن تھے اور اس تنظیم نے کہا ہے کہ اس کارروائی کا جواب دیا جائےگا۔

اطلاعات کے مطابق اسلامی جہاد کے رکن شادی موہانا اس وقت اسرائیل کے میزائل حملوں کی زد میں آئے جب وہ شمالی غزہ میں سے گزر رہے تھے۔

اس سے قبل اسرائیلی وزیرِ اعظم ایریئل شیرون نے کہا تھا کہ ان کا ملک شدت پسندوں کو نشانہ بنا کر ہلاک کرے گا۔ اسرائیلی وزیرِ اعظم کا یہ بیان اس بم دھماکے کے بعد آیا تھا جس میں پانچ افراد مارے گئے تھے۔

اسلامی جہاد نے اس بم دھماکے کی ذمہ داری قبول کی تھی اور کہا تھا کہ یہ کارروائی سینئر رہنماؤں کی ہلاکت کا جواب دینے کے لیے کی گئی تھی۔

عینی شاہدوں کے مطابق اسرائیلی میزائلوں نے ایک کار کو نشانہ بنایا جو جبالیہ کے پناہ گزین کیمپ کے علاقے سے گزر رہی تھی۔

’میزائل سے ہونے والا دھماکہ بہت طاقتور تھا اور اس سے گاڑی کے ٹکڑے اڑ کر فضا میں بکھر گئے جبکہ گلی میں سے گزرنے والے کئی افراد زخمی بھی ہوئے۔‘

اسلامی جہاد کے مطابق شمالی غزہ میں ان کی تنظیم کے فیلڈ کمانڈر اور ان کے نائب اس اسرائیلی حملے میں ہلاک ہوگئے۔

ان کے علاوہ پانچ دوسرے افراد بھی مارے گئے جن کے بارے میں خیال ہے کہ وہ اس مقام کے قریب تھے جہاں اسرائیل میزائل داغے گئے۔ ان کا شدت پسندوں سے کوئی تعلق نہیں تھا۔ اس حملے میں پندرہ کے قریب افراد زخمی ہوئے۔

اسرائیل کی فوج نے تصدیق کی ہے کہ اس نے اسلامی جہاد کے ’ایک دہشتگرد‘ کو نشانہ بنایا کہ وہ کئی ’قاتلانہ حملوں‘ میں ملوث تھا۔