’عرب لیگ سنّیوں کی تشویش سے اتفاق کرتی ہے‘

بی بی سی کو دیے گئے ایک انٹرویو میں انہوں نے عراقی آئین کے مسودے پر اتفاق رائے نہ ہونے پر تشویش کا اظہار کیا۔

انہوں نے کہا کہ عرب لیگ عراق میں وفاق سے متعلق سنّی رہنماؤں کی تشویش سے اتفاق کرتی ہے۔ انہوں نے کہا کہ عرب لیگ کو اس بات پر بھی تشویش ہے کہ آئئن میں عراق کو ایک عرب ملک نہیں کہا گیا ہے اور اس کی وجہ غیر عرب کردوں کو فائدہ پہچانا ہے۔

اس سےقبل برطانیہ اور امریکہ نے سنّی رہنماؤں کی جانب سے اٹھائے جانے والے اعتراضات کو مسترد کر دیا تھا۔ امریکی صدر بش نے کہا تھا کہ’ اگرچہ وہاں عدم اتفاق موجود ہے لیکن دنیا جمہوریت کو پنپتا ہوا دیکھ رہی ہے‘۔

اس سے قبل عراق کے سنّی رہنماؤں نے آئینی مسودے کو مسترد کر دیا تھا اور اقوامِ متحدہ اور عرب لیگ سے مداخلت کی اپیل کی تھی۔

یہ اپیل سنّی مداکرات کاروں کی جانب سے جاری کیے گئے ایک مشترکہ اعلامیے میں کہی گئی تھی جو عراقی پارلیمان میں آئینی مسودہ پیش کیے جانے کے بعد سامنے آیا۔

سینیئر سنّی مذاکرات کار عبدلنصر الجنابی نے کہا کہ ’ ہم یہ اعلان کرتے ہیں کہ ہم اس مسودہ سے متفق نہیں اور ہم اس میں شامل شقوں کو رد کرتے ہیں۔ ہم اس مسودے سے متعلق کسی بھی ایسی بات پر اتفاق نہیں کر سکے جس سے اسے قانونی حیثیت حاصل ہو سکے‘۔

انہوں نے کہا کہ’ ہم عرب لیگ، بین الاقوامی تنظیموں اور اقوامِ متحدہ سے اپیل کرتے ہیں کہ وہ مداخلت کریں اور اس دستاویز کو منظور ہونے سے روکیں اور اس میں شامل غلطیوں کو درست کرائیں‘۔

تاہم سنّی رہنماؤں نے عراق میں جاری سیاسی عمل سے علیحدہ نہ ہونے کا فیصلہ کیا اور کہا کہ وہ دسمبر میں ہونے والے انتخابات میں بھرپور شرکت کریں گے۔ انہوں نے عراقی سنیوں سے اپیل کی کہ وہ ووٹ ڈالنے کے لیے رجسٹر ہوں۔

عراق کی سنّی اقلیت اس آئین کو تسلیم کرنے پر آمادہ نہیں اور تجزیہ نگاروں کا خیال ہے کہ ان کا یہ عمل امریکہ کے لیے شدید دھچکے کا باعث ہو گا۔