گولی کا نشانہ بننے والا شخص سٹاک ویل سٹیشن سے ٹرین میں سوار ہوا تھا۔

لندن میٹروپولیٹن پولیس کمشنر سر آئن بلیئر نے کہا ہے کہ سٹاک ویل پر فائرنگ سے ایک شخص کی ہلاکت جاری آپریشن کا حصہ ہے۔

اخباری کانفرنس سے خطاب کرتے ہوئے انہوں نے لوگوں سے اپیل کی وہ افواہوں پر دھیان نہ دیں۔ انہوں نے واضح کیا کہ آپریشن جرائم پیشہ افراد کے خلاف ہے اور کسی ایک کمیونٹی کو اس کا نشانہ نہیں بنایا جا رہا۔

انہوں نے کہا کہ سٹاک ویل سٹیشن پر ہلاک ہونے والے شخص کو پولیس نے للکارہ تھا لیکن اس نے پولیس کا حکم ماننے سے انکار کر دیا۔

ایک عینی شاہد نے بی بی سی کو بتایا ہے کہ اس نے سادہ کپڑوں میں ملبوس پولیس افسران کو ایک شخص کو گولی مارتے دیکھا ہے۔

عینی شاہد کے مطابق گولی کا نشانہ بننے والا شخص دوڑ کر انڈرگراؤنڈ ٹرین میں سوار ہوا تھا۔

لندن کی میٹروپولیٹن پولیس نے بھی اس امر کی تصدیق کی ہے کہ مسلح پولیس افسران نے سٹاک ویل سٹیشن کے واقعہ میں حصہ لیا ہے۔

اس واقعہ کے بعد ناردرن لائن کو خالی کرا دیا گیا۔ ایمبولنس سروسز اور ائیر ایمبولنس جائے واردات پر پہنچ گئے ہیں اور پولیس نے ملحقہ گلیوں کو گھیرے میں لے لیا ہے۔

ایک عینی شاہد مسٹر وٹبی نے بی بی سی کو بتایا کہ وہ انڈرگراؤنڈ ٹیوب میں بیٹھ کر اخبار پڑھ رہے تھے کہ انہوں نے ایک شور سنا۔

ناردرن لائن اور وکٹوریہ لائن سٹاک ویل سٹیشن سے ہو کر گزرتی ہیں

درایں اثناء پولیس نے مشرقی لندن میں واقع ایک مسجد کو گھیرے میں لے لیا اور علاقے کے لوگوں کے اپیل کی کہ وہ اپنے گھروں سے باہر نہ نکلیں۔

بعد میں پولیس نے اعلان کیا کہ مسجد کا گھیراؤ بم کے خطرے کے پیش نظر کیا گیا تھا اور اب چونکہ خطرہ ٹل گیا ہے اس لیے وہاں تعینات پولیس کو ہٹا دیا گیا ہے۔

اس سے پہلے کہا گیا تھا کہ لندن میں بڑے پیمانے پر ان چار افراد کی تلاش جاری ہے جو لندن ٹیوب ٹرینوں اور ایک بس میں خود کش بم دھماکے کرنا چاہتے تھے۔

ماہرین کے مطابق جمعرات کو کیے گئے ناکام دھماکوں میں بھی اسی قسم کا مواد استعمال کیا گیا جس قسم کا سات جولائی کو کیے جانے والے دھماکوں میں کیا گیا تھا۔ استعمال کی جانے والی اشیاء کا وزن اور حجم بھی ایک جیسا تھا۔

جمعرات کو ہونے والے حملے 12:30 منٹ پر سینٹرل لندن میں وارن سٹریٹ سٹیشن، مغرب میں شیپرڈز بش سٹیشن، جنوب میں اوول اور مغربی لندن کے مقام شورڈچ میں کیے گئے۔

لندن کے علاقے شورڈچ میں چھبیس نمبر روٹ پر چلنے والی بس کی اوپر کی منزل میں ایک دھماکہ ہوا۔ اس سے بس کے شیشے ٹوٹ گئے تاہم کوئی جانی نقصان نہیں ہوا۔