وفد نے تین مشتبہ افراد سے کی جانے والے تفتیش کو بھی خود اپنی آنکھوں سے دیکھا۔

امریکی ارکان کانگریس نے گوانتانامو کے حراستی مرکز کا دورہ ایک ایسی وقت کیا ہے جب وہاں قیدیوں سے روا رکھے جانے والے سلوک پر تشویش کا اظہار کیا جا رہا ہے۔

گوانتانامو حراستی مرکز میں پانچ سو سے زائد غیر امریکیوں کو رکھا گیا ہے۔ اگرچہ افغانستان پر حملے کے دوران گرفتار کیے جانے والے ان افراد پر دشمن جنگجو ہونے کا الزام ہے لیکن ابھی تک ان میں سے صرف چار پر فردِ جرم عائد کی گئی ہے۔

حراستی مرکز کا دورہ کرنے والے سولہ کانگریس مین مسلح افواج سے متعلق ایوان کی کمیٹی کے ارکان ہیں اور ان کے ایک روزہ دورے کا مقصد حالات کا جائزہ لینا تھا۔

ریاست کیلیفورنیا سے ڈیموکریٹ رکنِ کانگریس ایلن توشر نے، جو حراستی مرکز کے معاملات کو زیادہ شفاف بنانے پر زور دیتے آئے ہیں، امریکی خبر رساں ادارے ایسوسی ایٹڈ پریس کو بتایا ہے کہ قیدیوں سے بدسلوکی کے واقعات کے منظر عام پر آنے کے بعد سے حراستی مرکز میں حالات میں بہتری آئی ہے۔

ریاست ٹیکساس سے ڈیموکریٹ رکن کانگریس شیلا جیکسن لی نے، جو مرکز کو مکمل طور پر بند کرنے کا مطالبہ کرتی آئی ہیں، کہا کہ وفد کو جو کچھ دکھایا گیا اس سے یہ پتا چلتا ہے کہ وہاں سہولتیں بہتر ہوئی ہیں۔

تاہم ارکان کانگریس نے اس بات پر اتفاق کا اظہار کیا کہ قیدیوں سے بدسلوکی کے واقعات کی روک تھام کے لیے اور اس سلسلے میں قانونی تقاضے پورے کرنے کے لیے مزید بہت کچھ کرنے کی ضرورت ہے۔

وفد نے تین مشتبہ افراد سے کی جانے والے تفتیش کو بھی خود اپنی آنکھوں سے دیکھا۔اِن میں سے ایک قیدی کو ہیری پوٹر گھنٹوں تک اونچی آواز میں پڑھ کر سنائی گئی یہاں تک کہ اس نے تفتیش کاروں کی طرف پیٹھ کر دی اور ہاتھ اپنے کانوں پر رکھ لیے۔