لوگ پیدل، بسوں کے ذریعہ اور ریل پر ہسپانیہ کی سرحد پار کرنے کی کوشش کر رہے ہیں۔

یہ تارکین وطن یورپ کے مختلف ممالک سے ہسپانیہ میں مستقل شہریت کے لیے قسمت آزمانے جا رہے تھے۔

ہسپانیہ نے وہاں کام کرنے والے غیر قانونی تارکین وطن کو شہریت دینے کے لیے ایک سکیم کا اعلان کیا ہے۔ یہ سکیم سات فروری سے سات مئی تک جاری رہے گی۔

اس سکیم کے تحت صرف ان لوگوں کو شہریت مِل سکتی ہے جو اگست سے ہسپانیہ میں موجود تھے اور کام کر رہے تھے۔ لیکن جرمنی، فرانس، اٹلی اور یورپ کے دوسرے ممالک میں رہنے والے پاکستانی بھی کسی نہ کسی طرح اس سکیم سے مستفید ہونا چاہتے ہیں۔

لوگ پیدل، بسوں کے ذریعہ اور ریل پر ہسپانیہ کی سرحد پار کرنے کی کوشش کر رہے ہیں۔ پکڑے جانے پر ان افراد کو پوچھ گچھ کے لیے فرانس لے جایا جاتا ہے جہاں پولیس کو مترجموں کا سہارا لینا پڑتا ہے۔

یہ غیر قانونی تارکین وطن پولیس سے کہتے ہیں کہ وہ انگریزی، فرانسیسی اور ہسپانوی نہیں بول سکتے اور اسی لیے پولیس ان لوگوں کو بغیر ان کے حقوق سمجھائے چھوڑنے پر مجبور ہو جاتی ہے۔

پولیس سے چھوٹ جانے کے بعد یہ لوگ ایک بار پھر ہسپانیہ کا رخ کرتے ہیں۔