نجیب میکاتی شام کے حامی تصور کیے جاتے ہیں

اگرچہ نامزد کردہ وزیرِ اعظم شام کے قریب بتائے جاتے ہیں لیکن ان کی اعتدال پسندی کی بنا پر حزب اختلاف کے اراکین نے بھی ان کی حمائت کی ہے۔

حزب اختلا ف کی جانب سے الزام لگایا جارہا تھا کہ شام نواز سیاسی حلقے ملک کے پارلیمانی انتخابات موخر کرنا چاہتے ہیں۔ جناب میکاتی نے کہا ہے کہ لبنان اب جمہوریت کے ایک نئے دور میں داخل ہورہا ہے اور ان کی حکومت اعتدال پسندی اور قومی وحدت کی علامت ثابت ہوگی۔

نجیب میکاتی نے نامزدگی کے بعد اپنے پہلے بیان میں کہا ہے کہ وہ وزیراعظم کے عہدے کے لئے اپنی نامزدگی کو اپنے لئے ایک اعزاز تصور کرتے ہیں اور فوری طور کابینہ کی تشکیل کا کام شروع کردیں گے۔

میکاتی کے لئے کابینہ کی تشکیل کے بعد جو سب سے اہم کام ہوگا وہ پارلیمان کے انتخابات کی تیاری ہوگی۔ یہ انتخابات مئی میں کرائے جانے ہیں۔

میکاتی ایک تاجر ہیں اور شام کے قریب بتائے جاتے ہیں۔ وزیراعظم کے عہدے کے لئے سبک دوش ہونے والے وزیردفاع عبدالرحیم مراد کا بھی نام زیرغور تھا۔ وہ بھی شام کے بہت قریب بتائے جاتے ہیں۔ حزب اختلاف نے میکاتی کی حمائت ان کے اعتدال پسندی کی بنیاد پر کی ہے اور اپنی اسی خصوصیت کی بنا پر وہ شام کے حامیوں میں بھی قابل قبول تصور کئے جاتے ہیں۔

میکاتی رفیق حریری کی کابینہ میں بھی کئی بار وزیر رہ چکے ہیں۔میکاتی نے اپنے بیان میں اپنی نامزدگی کے لئے سابق وزیراعظم رفیق حریری کی ہمشیرہ اور حزب اختلاف سے تعلق رکھنے والے اراکین کا خاص طور پر شکریہ ادا کیا اور کہا کہ انہیں یقین ہے کہ ان کی حکومت اعتدال پسندی اور قومی وحدت کی علامت ثابت ہوگی۔