 |  عنان نے حکومت کے کہنے پر تامل علاقوں کا دورہ منسوخ کیا ہے |
اقوام متحدہ کے سیکریٹری جنرل کوفی عنان سری لنکا کے سونامی سے تباہ شدہ علاقوں کو دورہ کر رہے ہیں جہاں پر کم از کم تین ہزار افراد ہلاک ہو گئے تھے۔ کوفی عنان نے ہمبنٹوٹا کے علاقے میں ایک سکول کا دورہ کیا اور اس کے بعد وہ مشرقی ساحل پر واقع شہر ٹرکومالی چلے گئے۔ تاہم کوفی عنان نے تامل باغیوں کے زیر اثر علاقوں کا دورہ حکومت کے کہنے پر منسوخ کردیا ہے۔ بحر ہند میں چھبیس دسمبر کو آنے والے زلزلے اور طوفان سے ڈیڑھ لاکھ افراد ہلاک ہوگئے تھے۔ اقوام متحدہ نے خبردار کیا ہے کہ اس طوفان میں مرنے والوں کی تعداد بڑھ سکتی ہے کیونکہ بہت سے لاپتہ لوگوں کا ابھی تک کوئی علم نہیں ہو سکا ہے۔ سری لنکا میں تامل باغیوں نے کہا ہے کہ شمالی علاقوں کو بہت کم امداد مہیا کی گئی ہے جبکہ حکومت ان الزامات کی تردید کی ہے۔ باغیوں نے دھمکی دی ہے کہ اگر ریلیف کیمپوں سے سرکاری فوجیوں کو ہٹایا نہ گیا تو اس کے سنگین نتائج برآمد ہوں گے۔ تامل باغیوں نے کہا ہے کہ کوفی عنان نے ان کے رہنما ویلوپیلائی پربھارکرن کی دعوت قبول کر لی تھی۔ کوفی عنان نے برطانوی خبر رساں ادارے رائٹر کو بتایا کہ وہ متاثرہ علاقوں کے دورے پر ہیں اور تمام علاقوں کا دورہ کرنا چاہیں لیکن کیونکہ وہ حکومت کی دعوت پر سری لنکا آئے ہیں اس لیے ان ہی کے پروگرام پر چلیں گے۔ تامل باغیوں اور حکومت کے درمیان اپریل دو ہزار تین میں ہونے والے جنگی بندی پر عمل کیا جا رہا ہے۔ سری لنکا میں تامل باغی گزشتہ دو عشروں سے شمالی اور مشرق میں تامل علاقوں میں خومختار حکومت بنانے کے لیے جدوجہد کر رہے ہیں اور اس میں ساٹھ ہزار افراد ہلاک ہو چکے ہیں۔ جمعہ کو کوفی عنان نے انڈونیشیا کا دورہ کیا تھا جہاں ایک لاکھ کے قریب افراد ہلاک ہو گئے ہیں۔ کوفی عنان نے کہا کہ انہوں نے اپنی زندگی میں اس طرح کی تباہی نہیں دیکھی۔ انڈونیشیا میں بھی علیحدگی پسندوں اور حکومت میں کشیدگی کی خبریں ملی ہیں۔ حکومت اور آزاد آچے تحریک نے آفت زدہ علاقوں میں حملوں کے الزامات پر ایک دوسرے پر عائد کئے ہیں۔ کولن پاول نے بھی انڈونیشیا کے آفت زدہ علاقوں کا دورہ کیا ہے۔ | 
یہ صفحہ دوست کو ای میل کیجیئے
پرِنٹ کریں
