متاثرین کو بہت زیادہ مدد کی ضرورت ہے

صرف انڈونیشیا ہی میں سیلاب کی نذر ہونے والے افراد کی تعداد حکام 80 ہزار بتا رہے ہیں۔ اس تعداد میں مزید اضافے کا خدشہ ہے۔

امدادی کارکن ان لاکھوں افراد تک رسائی حاصل کرنے کی کوشش کررہے ہیں جن کی جانیں تباہ کن لہروں سے تو بچ گئی ہیں تاہم ان کے پاس اشیائے خوردنی اور سر چھپانے کی جگہ کی شدید قلعت ہے۔

امدادی ٹیمیں متاثرہ علاقوں میں امدادی اشیاء پہنچا رہی ہیں تاہم اب بھی سب سے زیادہ متاثر ہونے والے کئی دور دراز اور پسماندہ علاقوں تک ان ٹیموں کی رسائی ممکن نہیں ہوسکی ہے۔

بحر ہند میں مزید زلزلوں کے جھٹکوں اور سونامی لہروں کے پیدا ہونے کے خدشے نے بھارت اور انڈونیشیا میں خوف و ہراس پھیلا دیا ہے۔

امریکہ، آسٹریلیا، جاپان اور بھارت نے مل کر زلزلے اور طوفان سے متاثر ہونے والوں کی امداد کے لیے ایک بین الاقوامی اتحاد بنایا ہے۔

عالمی برادری نے 220 ملین ڈالر کی امداد پہنچانے کا عہد کیا ہے جس میں سے 35 ملین ڈالر امریکہ فراہم کرے گا۔

تاہم اقوامِ متحدہ کے ریلیف کوآرڈینیٹر جان ایگلینڈ کا کہنا ہے کہ امدادی کاموں کے پوری طرح سے شروع کرنےمیں دو سے تین دن لگ سکتے ہیں جو کہ امداد کے منتظر لاکھوں افراد کے لیے زندگی و موت کا معاملہ ثابت ہوسکتا ہے۔ ان کا کہنا ہے ’ابھی ہم امداد کے لیے بہت کم کوششیں کررہے ہیں اور میرے خیال میں آنے والے وقت میں متاثرین مزید الجھن اور پریشانی کا شکار ہوسکتے ہیں۔‘

انڈونیشیا کے دارالحکومت آچے میں لوگ پہلے ہی مشتعل ہونا شروع ہوگئے ہیں۔ متاثر ہونے والے ایک شخص کا کہنا تھا ’ہمیں چاول اور ادویات کی ضرورت ہے۔ میں نے دو دن سے کچھ نہیں کھایا ہے‘۔

کم از کم پچاس لاکھ لوگوں کو زندہ رہنے کے لیے بنیادی مدد کی ضرورت ہے۔

ملبے سے لاشیں ابھی تک نکالی جارہی ہیں

ریڈ کراس کے ایک اعلٰی اہلکار پیٹر ریس نے کہا ہے کہ بھارت کے جزائر اینڈمان اور نکوبار میں جانی نقصان کے صحیح اعداو شمار سامنے آنے کے بعد مرنے والوں کی تعداد بڑھ جائے گی۔

جنوبی سری لنکا میں متاثرین کا کہنا ہے کہ حکومتی امداد بہت کم ہے۔ گال میں بی بی سی کی نامہ نگار ڈومیتھا لتھرا کے مطابق متاثرین کو پانی کی بوتلیں اور بسکٹ دیے گئے ہیں لیکن یہ ان کی ضرورت سے بہت کم ہیں۔

انڈونیشیا کے صوبے آچے کے دارالحکومت باندا آچے میں غیرملکی مدد طیارے اترنا شروع ہو گئے ہیں۔ لیکن امداد کا زیادہ کام ابھی بھی ہزاروں لاشوں کو اکٹھا کرنا ہے۔

بھارت کی جنوبی ریاست تامل ناڈو میں مقامی امدادی ایجنسیاں خوراک، کپڑے اور کمبل تقسیم کر رہی ہیں۔

دوسری طرف تامل ناڈو کی حکومت نے ریاست میں سونامی طوفان کی نئی وارننگ دی ہے۔

خبر رساں ادارے رائٹرز کے مطابق ریاستی حکومت نے کہا ہے کہ جزائر انڈامان اور نکوبار میں دوبارہ آنے والے زلزلے کے جھٹکوں کی وجہ سے بری لہریں دوبارہ ساحل کی طرف آ سکتی ہیں۔ حکومت نے لوگوں کو خبردار کیا ہے کہ وہ ساحلی علاقے چھوڑ کر کہیں اور چلے جائیں۔

اقوام متحدہ کا کہنا ہے کہ متاثرہ علاقوں میں وبائی امراض پھیلنے سے بھی بہت بڑی تعداد میں لوگوں کے ہلاک ہونے کا خدشہ ہے۔

بھارتی حکومت نے اعلان کیا ہے کہ وہ اس طرح کی زلزلوں سے پیدا ہونے والی سومانی طوفانوں سے بچنے کے لیے ایک حفاظتی نظام قائم کر رہا ہے۔

ُُسائنسدانوں اور ماہرین کا خیال ہے کہ اگر بحر ہند کے ساحلوں پر واقع ممالک میں بھی قبل از وقت خبردار کرنے کا ایسا ہی نظام موجود ہوتا جو بحرالکاہل کے کناروں پر واقع ممالک میں قائم ہے تو بہت سی جانوں کو ضائع ہونے سے بچایا جا سکتا تھا۔

برطانوی حکومت نے بھی بدھ کو پندرہ لاکھ پونڈ کی امداد کا اعلان کیا اور یوں یہ امداد مہیا کرنے والوں کی فہرست میں دوسرے نمبر پر آ گیا۔

دریں اثناء جرمنی کے چانسلر گیرہارڈ شروڈر نے کہا ہے کے طوفان سے متاثرہ انڈونشیا اور صومالیہ کے بین الاقوامی قرضوں کی ادائیگی کو مؤخر کر دیا جائے۔

مرنے والے سیاحوں کی تعداد بھی بڑھ سکتی ہے

انڈونیشیا میں ہزاروں کی تعداد میں فوجیوں کو اجتماعی قبریں کھودنے کے کام پر لگا دیا گیا ہے۔

بی بی سی کی نامہ نگار ریچل ہاروی نے انڈونشیا کے صوبائی دارالحکومت بند آچے سے اطلاع دی ہے کہ انہوں نے صرف بیس منٹ کے وقفے میں لاشوں سے بھرے دس ٹرک گنے جن کو ایک اجتماعی قبر میں دفنانے کے لیے لے جایا جا رہا تھا۔