 |  ’جوہری پروگرام پرامن ہے‘ |
امریکہ نے کہا ہے کہ تین یورپی ممالک ایران کو ایک ایسا منصوبہ پیش کریں گے جس میں تہران کے ایٹمی عزائم کے مسئلے سے نمٹنے کے لیے سفارتی حل ہوگا۔ یہ منصوبہ برطانیہ، فرانس اور جرمنی کی جانب سے اگلے ہفتے پیش کیا جائیگا ۔ کہا جارہا ہے کہ اس منصوبے میں ایران کے لیے تجارتی مراعات اور غیر فوجی استعمال کے لیے ایٹمی ایندھن کی فراہمی شامل ہیں۔ امریکی وزارتِ خارجہ کے ترجمان ٹام کیسی نے خبر رساں ادارے رائٹرز کو بتایا کہ یورپی اتحاد کے تینوں (ممالک) نے اشارہ کیا ہے کہ وہ اگلے ہفتے اپنے منصوبہ ایران کو پیش کریں گے۔ ایران نے کہا ہے کہ اس کا جوہری پروگرام پرامن ہے اور صرف بجلی پیدا کرنے کے لیے ہیں۔ بی بی سی کے نامہ نگار پال رینلڈز کے مطابق امریکہ اور یورپی یونین کے تینوں ممالک کے درمیان مذاکرات اس وقت ہوئے ہیں جب مغرب ایران کے جوہری منصوبے کے متعلق کافی مایوس ہے۔ بی بی سی کے نامہ نگار نے کہا ہے کہ برطانیہ، فرانس اور جرمنی یہ سمجھتے ہیں کہ اقوامِ متحدہ کے جوہری ادارے آئی اے ای اے کی نومبر 25 کی میٹنگ سے پہلے یہ امید کی ایک کرن ہے۔ | 
یہ صفحہ دوست کو ای میل کیجیئے
پرِنٹ کریں
