 |  بغداد میں امریکی ٹینک تباہ کیا گیا ہے۔ |
عراق سے موصول ہونے والی اطلاعات کے مطابق بغداد کے مرکزی علاقے میں شدید لڑائی میں ایک صحافی سمیت بیس عراقی ہلاک اور سو زخمی ہو گئے ہیں۔ بغداد کے’ گرین زون‘ کے علاقے سے جہاں عراقی عبوری حکومت کے دفاتر، امریکہ اور دیگر ممالک کے سفارت خانے قائم ہیں ، فائرنگ اور دھماکوں کی مسلسل آوازیں سنی گئی ہیں اور اس علاقے سے دھویں کے سیاہ بادل بھی اٹھتے ہوئے دیکھے گئے ہیں۔ آئینی شاہدوں کے مطابق بغداد میں یہ شدید ترین لڑائی ہے۔امریکی ہیلی کاپٹروں نے بھی فوجی کارروائی میں حصہ لیا اور علاقے میں مختلف جگہوں پر راکٹوں سے حملہ کیا ہے۔ امریکی ہیلی کاپٹر نے ایک تباہ شدہ امریکی گاڑی کا نظارہ کرنے والوں پر میزائیل فائر کیا جس سے دو بچے اور عرب ٹی وی چینل ، العریبہ کے ایک صحافی ہلاک ہو گئے۔ اطلاعات کے مطابق ابو غریب جیل پر ایک کار بم سے حملہ کرنے کی کوشش کی گئی ہے۔ بغدار کے شمال میں رمادی سے بھی لڑائی کی اطلاعات ہیں۔ بغداد میں ایک کار بم دھماکے کی بھی اطلاع ہے جس میں دو پولیس والوں سمیت ایک بچہ بھی ہلاک ہوگیا ہے۔ بغداد کا گرین زون کا علاقہ جس میں سرکاری دفاتر اور غیر ملکی سفارت خانے قائم ہیں عراقی مزاحمت کارروں کی کارروائیوں کا اکثر نشانہ بنتا رہتا ہے۔ اتوار کی صبح بغداد میں درجنوں دھماکوں کی آوازیں سنی گئیں اور پوار شہر ان دھماکوں سے لرزتا رہا۔ | 
یہ صفحہ دوست کو ای میل کیجیئے
پرِنٹ کریں
