امریکی وزیر دفاع ڈونلڈ رمزفیلڈ

انہوں نے بتایا کہ ’صبح کے وقت جب میں کمرے سے نکلتا ہوں تو بیگم پلٹ کر آواز دیتی ہیں کہ UBL کہاں ہیں (Usama Bin Ladin کا مخفف)؟

امریکی وزیر دفاع نے زور دے کر بتایا کہ اسامہ کی تلاش میں کوئی کمی نہیں آئی ہے۔

سنگاپور میں موجود امریکی بحری جہاز پر موجود میرینز سے خطاب کرتے ہوئے رمز فیلڈ نے یہ نہیں بتایا کہ وہ اپنی اہلیہ کو جواب میں کیا کہتے ہیں۔

تاہم رمزفیلڈ نے یہ تسلیم کیا کہ اسامہ کی موجودگی کا معاملہ اب بھی پراسرار ہے۔

خبر رساں ادارے اے پی نے رمزفیلڈ کا حوالہ دیتے ہوئے کہا کہ’اس بات کے کوئی معنی نہیں کہ ہم اسامہ کے ’قریب‘ پہنچ گئے ہیں خاص طور پر ایسے وقت میں کہ جب کسی دہشت گرد کی تلاش کا معاملہ ہو۔ اگر وہ زندہ اور صحت مند ہیں تو یقیناً اس کوشش میں ہوں گے کہ وہ پکڑے نہ جائیں۔ ان پر دباؤ تو ہے لیکن وہ ہیں کہاں۔۔۔ ہم نہیں جانتے۔ اگر ہمیں علم ہوتا تو جا کر پکڑ لیتے۔ لیکن وہ ابھی تک پکڑے نہیں گئے اس کا مطلب ہے کہ وہ ہمارے قابو میں نہیں۔‘

امریکی وزیر دفاع کو اپنے گول مول بیانات کے سبب کسی حد تک بدنامی کا سامنا بھی کرنا پڑا ہے۔ انہوں نے کہا کہ ایک روز کسی مخبری کے نتیجے میں اچانک اسامہ کا سراغ مل جائے گا بالکل اسی طرح جیسے معزول عراقی صدر صدام حسین کے ساتھ ہوا تھا۔

انہوں نے واضح کیا کہ اسامہ کی تلاش میں سرتوڑ کوششیں جاری ہیں۔