 |  امریکی فوج عراقی جنگ میں کئی مساجد کو نشانہ بنا چکی ہے |
عراقی شہر فلوجہ اور نجف میں مزاحمتی گروہوں سے برسرِپیکار امریکی فوج کو شورش زدہ علاقوں میں مساجد سے متعلق ایک ہی سے مسائل اور تذبذب کا سامنا ہے۔ مذہبی امور سے متعلق بی بی سی کی نامہ نگار جین لیٹل لکھتی ہیں کہ پیر کو فلوجہ میں ہونے والی شدید لڑائی کے دوران امریکی میرین فوج نے ٹینک سے حملہ کر کے ایک مسجد کا مینار تباہ کر دیا تھا جو ان کے بقول باغی عراقیوں کا اڈہ تھا۔ جین لیٹل کے بقول یہ ایک اشتعال انگیز کارروائی تھی لیکن وہ لکھتی ہیں کہ اسلام میں مساجد کو اُس طرح مقدس تصور نہیں کیا جاتا جیسا تقدس گرجا گھروں کو عیسائیت میں حاصل ہے۔ برطانیہ کی کیمبرج یونیورسٹی میں اسلامی تعلیمات کے شعبے سے وابستہ پروفیسر عبدالحاکم مراد کہتے ہیں کہ ’اسلام کسی چیز کو مقدس یا غیرمقدس نہیں بنا سکتا۔ مسجد ایک گرجا گھر سے مختلف ہوتی ہے اور پیغمبر اسلام نے بھی کہا تھا کہ مسلمانوں کے لئے پوری زمین کو مسجد بنا دیا گیا ہے‘۔ پروفیسر مراد کہتے ہیں کہ اسلامی حوالے سے مسجد کی اہمیت چاہے کچھ بھی ہو لیکن بیشتر مسلمانوں کے لئے مساجد کی بہت اہمیت ہے۔ |  حضرت علی کا روزہ |
وہ کہتے ہیں کہ ’عام تصور یہی ہے کہ امریکی انتظامیہ، جو ایوینجلیکل چرچ کی گرفت میں ہے، عراق کو نہ صرف امریکی فوجیوں اور تیل کے ماہرین سے بلکہ عیسائیت کا پرچار کرنے والے مشنری سے بھی بھر دینا چاہتی ہے۔ اس لئے مسلمانوں کی نگاہ میں فلوجہ میں مسجد کا مینار مسمار کیا جانا اسلام کو نشانہ بنانے کے مترادف ہے‘۔ عراق میں مذہب اور سیاست کے حوالے سے جاری اس نازک صورت حال میں نجف شہر امریکیوں کے لئے سب سے بڑا مسئلہ ہے۔ شیعہ رہنما مقتدیٰ الصدر اور ان کے حامی تاریخ اسلام کے اہم شہیدوں کی آخری آرام گاہ کے حوالے سے نجف کو انتہائی مقدس گردانتے ہیں اور اس کا تحفظ کرنے کے لئے تیار ہیں۔ مقتدیٰ الصدر کے اہم قریبی ساتھی شیخ جلیل النوری نے مصری ریڈیو پر گفتگو کرتے ہوئے کہا کہ ’سب یہ بات مانتے ہیں کہ نجف مقدس شہر ہونے کے علاوہ منفرد مذہبی، ثقافتی اور تاریخی اہمیت کا بھی حامل ہے۔ لادین فوجوں کی پیش قدمی تو درکنار، کسی کو بھی نجف کا تقدس پامال نہیں کرنا چاہئے‘۔ انہوں نے اس بات کی بھی تردید کی کہ ملک کے مقدس مقامات میں اسلحہ جمع کیا جا رہا ہے۔ ایک تجزیہ نگار کے بقول مقتدیٰ الصدر کے حامیوں کی جانب سے کئے جانے والے خود کش حملوں کے باعث امریکی فوج شہر کے کنارے پر ہی رکی ہوئی ہے۔ تاہم بی بی سی کے علاقائی امور کے تجزیہ نگار صادق صبا کے مطابق عراق کی شیعہ قیادت اس بات پر برہم ہے کہ مقتدیٰ الصدر کی کارروائیوں کے سبب نجف شہر کے لئے خطرہ پیدا ہو گیا ہے۔ | 
یہ صفحہ دوست کو ای میل کیجیئے
پرِنٹ کریں
