بھارت: مدھیہ پردیش میں سیلاب سے 12 افراد ہلاک

انڈیا کی وسطی ریاست مدھیہ پردیش میں تین دن سے مسلسل جاری بارش کے نتیجے میں اب تک 12 افراد ہلاک ہو گئے ہیں۔

حکام کا کہنا ہے کہ کئی اضلاع سیلاب کی زد میں ہیں اور ہزاروں لوگ متاثر ہوئے ہیں۔

ستنا ضلعے میں سیلاب سے متاثرہ لوگوں کی مدد کے لیے فوج کو طلب کیا گيا ہے۔ ریاست کے تمام 51 اضلاع میں امدادی مراکز کھولے گئے ہیں۔

دارالحکومت بھوپال سمیت تقریبا نصف مدھیہ پردیش میں سیلاب کا خطرہ ہے۔

بھوپال میں سنیچر کی رات سے ہونے والی مسلسل بارش نے صورت حال کو مزید خراب کر دیا ہے اور وہاں چار لوگوں مارے گئے ہیں۔ بہت رہائشی علاقوں میں پانی بھر گیا ہے اور کئی مقامات پر پانچ فٹ سیل رواں ہے۔

محکمہ موسمیات نے بعض مقامات پر اگلے 24 گھنٹوں کے دوران مزید بارشوں کی پیش گوئی کی ہے۔

شدید بارش کے سبب ریاست سے گزرنے والے دریا نرمدا، پاروتی، چمبل اور کین میں طغیانی ہے۔

بندیل کھنڈ علاقے کے پانچ اضلاع ساگر، چھتر پور، ٹیکم گڑھ، پننا، اور دموہ میں حالات ایسے ہی ہیں جیسے وہاں بادل پھٹ گئے ہوں۔

یہاں تین دنوں میں اوسطاً 300 ملی میٹر سے زیادہ بارش ریکارڈ کی گئی ہے۔ یہ وہ علاقے ہیں جو گذشتہ ہفتے تک خشک سالی کا سامنا کر رہے تھے اور اب حالات یہ ہے کہ لوگ بارش سے بے حال ہیں۔

وزیر اعلیٰ شیوراج سنگھ چوہان نے سیلاب کی صورت حال کا جائزہ لینے کے لیے خصوصی اجلاس طلب کیا ہے۔

وزیر اعلی شیوراج سنگھ چوہان نے بتایا: ’حکومت بھوپال کے سیلاب سے متاثرہ علاقوں میں کھانے کے پیکٹ فراہم کرا رہی ہے۔ ستنا میں سیلاب میں پھنسے 4000 لوگوں کو نکالا گیا ہے۔

انھوں نے کہا کہ حکومت سیلاب کے حالات سے نمٹنے کے لیے مکمل طور پر تیار ہے اور 51 اضلاع میں امدادی مرکز کھولے گئے ہیں۔