انڈیا: ایمبیسیڈر گاڑی کا برانڈ معمولی قیمت میں فروخت

ایک زمانے میں انڈیا میں مرتبے، شاہانہ آن بان اور اثر و رسوخ کا مترادف کہی جانے والی ایمبیسیڈر کار کا برانڈ ایک لاکھ 20 ہزار ڈالر کی معمولی قیمت پر فروخت کر دیا گیا ہے۔

حکام کے مطابق اس برانڈ کے مالک ہندوستان موٹرز نے فرانسیسی کمپنی پیریو کے ہاتھ ایمبیسیڈر کو فروخت کر دیا ہے۔.

ایک وقت تھا جب انڈیا میں یہ سرکاری گاڑی ہوا کرتی تھی، لیکن سنہ 2014 کے بعد سے ہی اس کی مینوفیکچرنگ بند کر دی گئی تھی۔

تاہم ابھی یہ واضح نہیں ہے کہ پیریو اب اپنے ایمبیسیڈر برانڈ کو دوبارہ لانچ کرے گی یا نہیں۔

برطانوی مورس اوکسفرڈ کی طرز پر بنی ایمبیسیڈر کار انڈیا میں تین دہائیوں تک بیسٹ سیلر رہی۔

ایک عرصے سے پیریو انڈیا میں اپنے قدم جمانے کا متمنی رہا ہے اور نوے کی دہائی میں جب ملک کی معیشت کو لبرلائز کیا گیا تو انڈیا میں آنے والی یہ چند بیرونی کمپنیوں میں سے ایک رہی ہے۔

سنہ 60 کی دہائی سے لے کر سنہ 80 کی دہائی تک یہ انڈیا میں اعلیٰ مرتبے کی علامت رہی اور یہ بڑے پیمانے پر لگژری کاریں بناتی رہی۔

اس کار کو اس کی خوبصورتی کی وجہ سے نہیں یاد کیا جاتا لیکن کشادہ اور کم شور کو بہت سراہا جاتا ہے کیونکہ یہ انڈیا کی سڑکوں کے لیے بہت مناسب ہے۔

انڈیا میں یہ پہلی کار ہے جو ڈیزل پر چلائی گئی ہے اور اس ایئر کنڈیشن کے لحاظ سے بھی یہ پہلی ہے۔

لیکن انڈیا کے بازار میں بے شمار بیرونی کاروں کی آمد کے بعد سے اس کی فروخت میں مسلسل کمی آتی گئی یہاں تک کہ جب اسے بند کیا گیا تو اس کی سالانہ فروخت صرف دو ہزار رہ گئی تھی۔