دلاورخان وزیر بی بی سی اردو ڈاٹ کام پشاور

	مولانا صوفی محمد نے حکومت اورطالبان کے درمیان امن معاہدہ کرانے میں اہم کردار ادا کیا ہے

سوات میں ایک پریس کانفرنس سے خطاب کرتے ہوئے مولانا صوفی محمد نے حکومت اور مقامی طالبان کو کہا ہے کہ وہ پندرہ مارچ تک ایک دوسرے کے قیدیوں کو رہا کر دیں ورنہ نفاذ شریعت محمدی کے اہلکار احتجاج کریں گے۔

انہوں نے حکومت سے مطالبہ کیا ہے کہ ملاکنڈ ڈویژن میں جاری عدالتی کارروائی کو فوری طور پر روک کرکے شرعی عدالتوں کا قیام عمل میں لایا جائے۔

مولانا صوفی محمد نے کہا کہ سوات میں شریعت کے عملی نفاذ کے بغیر امن ممکن نہیں ہے۔ان کا کہنا تھا کہ سوات کے شہری علاقوں میں اسلحہ کی نمائش پر مکمل پابندی ہوگی اور خلاف ورزی کی صورت میں شرعی سزا دی جائے گی۔

اس ساری صورتحال پر تبصرہ کرتے ہوئے سینئر صحافی ڈاکٹر اشرف علی نے بتایا کہ صوبائی حکومت کی جانب سے قیدیوں کی رہائی ایک مشکل مرحلہ ہے۔ انہوں نے کہا کہ مقامی طالبان کا جن قیدیوں کی رہائی مطالبہ ہے وہ قیدی خفیہ اداروں کے تحویل میں ہیں۔اس سے پہلے جو معاہدہ ہوا تھا اس میں بھی صوبائی حکومت ان کو رہا کرنا چاہتی تھی لیکن ایسا نہیں کر سکی جس کی وجہ بنا پر معاہدہ ٹوٹ گیا۔