دلاورخان وزیر بی بی سی اردو ڈاٹ کام پشاور

بہت سے تباہ شدہ سکولوں نے عارضی خیموں میں کلاسوں کا آغاز کردیا ہے

حکام کے مطابق ضلع کے باقی علاقوں کے تعلیمی ادارے یکم مارچ سے کھول دیئے جائیں گئے تاہم سکولوں کی تباہ شدہ عمارتوں کی جگہ خیموں میں سکول قائم کرنے کا کام جاری ہے۔

دو روز قبل ضلع سوات میں طالبان کے سربراہ مولانا فضل اللہ نے اپنے ایف ایم ریڈیو چینل پر خطاب کرتے ہوئے لڑکیوں کے تعلیم حاصل کرنے پر لگائی جانے والی پابندی کو جزوی طور پر واپس لینے کا اعلان کیا تھا۔

انہوں نے لڑکیوں کی تعلیم سے پابندی جزوی طور پر ہٹاتے ہوئے کہا تھا کہ لڑکیوں کو صرف امتحانات دینے کی اجازت ہوگی جو سترہ مارچ سے شروع ہورہے ہیں۔

لڑکیوں کی تعلیم

انہوں نے کہا کہ سوات میں تعلیمی اداروں میں سردیوں کی تعطیلات یکم مارچ تک ہوتی ہیں۔ لیکن انہوں نے اس لیے کچھ دن پہلے تعلیمی اداروں کو کھولنے کا اعلان کیا ہے۔ تاکہ یکم مارچ تک اساتذہ کی حاضری یقینی ہوجائے۔

انہوں نے کہا کہ مینگورہ کے علاوہ دوسرے علاقوں میں تعلیمی ادارے کھولنے کے لیے اعلانات کیے ہیں۔ لیکن وہ پیر سے اس لیے ممکن نہ ہوسکا کہ زیادہ تر سکول تباہ کردیے گئے ہیں اور بچوں کے لیے سکولوں میں کوئی کلاس روم موجود نہیں ہے۔

ان کا کہنا تھا کہ پورے ضلع میں دو سو کے قریب سکول تباہ کیے گئے ہیں جن کی تعمیر پر ایک سال سے زیادہ عرصہ لگے گا۔

ادھر حکومت کی جانب سے مستقل جنگ بندی کے اعلان کے بعد سکیورٹی فورسز نے سوات میں غیر ضروری چیک پوسٹوں کو ختم کر دیا ہے جبکہ دوسری طرف وادی سے نقل مکانی کرنے والے لوگ واپس اپنے گھروں کو لوٹنا شروع ہوگئے ہیں۔

سوات میڈیا سنٹر کے ایک اعلی اہلکار نے بی بی سی کو بتایا تھا کہ گزشتہ روز صوبہ سرحد کی جانب سے سوات میں مستقل جنگ بندی کے اعلان کے بعد اتوار کو سکیورٹی فورسز نے تمام غیر ضروری چیک پوسٹوں کو ختم کردیا ہے۔

خیال رہے کہ سوات میں جنگ بندی کے حوالے سے صوبائی حکومت اور کالعدم ’تحریکِ نفاذ شریعت محمدی‘ کے درمیان ہونے والے معاہدے کے بعد مولانا فضل اللہ نے کہا تھا کہ ان کی جانب سے جو دس دن کی جنگ بندی کا اعلان کیا گیا ہے اسے مستقل کرنے کا حتمی فیصلہ ان کی شوریٰ کرے گی۔