آصف فاروقی بی بی سی اردو ڈاٹ کام، اسلام آباد

	عام تاثر یہ ہےکہ مقدمہ کا فیصلہ جلد سنایا جاسکتا ہے

سوموار کو سماعت ملتوی کرتے ہوئے بنچ کے سربراہ جناب جسٹس موسیٰ کے لغاری نے عدالت میں موجود سرکاری وکلا سے کہا کہ منگل کو اٹارنی جنرل بھی عدالت میں حاضر کریں۔

عدالتی ماہرین کا کہنا ہے کہ یہ مقدمہ آخری مراحل میں داخل ہو چکا ہے اور اب جبکہ دونوں جانب سے دلائل تقریباً مکمل ہو چکے ہیں عدالت کسی بھی وقت اس مقدمے پر فیصلہ سنا سکتی ہے۔

تاہم اس بارے میں جب شریف برادران کے مخالف وکیل احمد رضا قصوری سے پوچھا گیا تو انکا کہنا تھا کہ انہیں قطعاً اندازہ نہیں ہے کہ اس مقدمے کا فیصلہ کب تک سنایا جا سکتا ہے۔

عدالت کے سامنے اس مقدمے میں شریف برادران کے مخالف وکیل احمد رضا قصوری کے دلائل پیر کو بھی جاری رہے۔

انکا کہنا تھا کہ وزیراعلیٰ پنجاب شہباز شریف عدالتی فیصلوں، بدعنوانی کے مقدمات اور حکومت پاکستان سے کئے جانے والے جلا وطنی کے معاہدات کی خلاف ورزی کی بنیاد پر پاکستان میں کسی بھی عوامی عہدے کے انتخاب میں حصہ لینے کے اہل نہیں ہیں۔

انہوں نے اس موقعے پر عدالت کے سامنے ایک وڈیو بھی پیش کی جس میں احمد رضا کے مطابق وزیراعلیٰ پنجاب کی وہ پریس کانفرنس دکھائی گئی ہے جس میں وہ مبینہ طور پر عدالت عظمیٰ کے خلاف نازیبا گفتگو کر رہے ہیں۔

عدالت کے استفسار پر وکیل مخالف نے کہا کہ وہ عدالت کے سامنے ان اخباری بیانات کی نقول بھی پیش کریں گے جن سے ثابت ہوتا ہے کہ شہباز اور نواز شریف عدالت کے بارے میں نازیبا زبان استعمال کرتے ہیں۔

واضح رہے کہ چند ہفتے قبل عدالت کے سامنے یہ نکتہ اٹھائے جانے کے باوجود شریف برادران اپنے اس مؤقف سے دستبردار نہیں ہوئے کہ تین نومبر کے بعد حلف اٹھانے والے اعلیٰ عدالت کے جج آئینی نہیں بلکہ’پی سی او ججز‘ ہیں اور یہ کہ وہ ان عدالتوں کی آئینی حیثیت کو تسلیم نہیں کرتے۔