شہزاد ملک بی بی سی اردو ڈاٹ کام، اسلام آباد

	صوبہ بلوچستان میں جوڑ توڑ کا سلسلہ جاری ہے

ان نومنتخب ہونے والے ارکان میں حکومت میں شامل اتحادی جماعتوں کے نمائندے شامل ہیں جن میں پاکستان پیپلز پارٹی کے تین ، عوامی نیشنل پارٹی کے تین اور جمعیت علمائے اسلام فضل الرحمن گروپ کا ایک رکن شامل ہے۔

سیکریٹری الیکشن کمیشن کنور دلشاد کے مطابق ان انتخابات میں ریٹرنگ افسر نے جنرل نشستوں پر آزاد اُمیدوار تنویر علی آغا کے کاغذات نامزدگی مسترد کر دیے تھے اس لیے اس بات کا امکان ہے کہ تمام نشستوں پر اُمیداور بلامقابلہ منتخب ہوجائیں گے۔

غیر سرکاری نتائج کے مطابق جو اُمیدوار بلامقابلہ منتخب ہوئے ہیں اُن میں پاکستان پیپلز پارٹی کے سینیٹر گلزار احمد خان، وقار احمد خان اور سردار علی خان، عوامی نیشنل پارٹی کے زاہد خان، حاجی عدیل اور عبدالنبی بنگش جبکہ جے یو آئی کے حاجی غلام علی شامل ہیں۔

واضح رہے کہ حاجی غلام علی صوبائی دارحکومت پشاور کے ناظم تھے تاہم وہ ان انتخابات میں حصہ لینے کے لیے اپنے عہدے سے مستعفی ہوگئے تھے۔

جمعہ کو وزیر اعظم یوسف رضا گیلانی اور سینیٹ میں پاکستان مسلم لیگ نون کے پارلیمانی لیڈر اسحاق ڈار کے درمیان مذاکرات کے بعد پاکستان مسلم لیگ نے صوبہ سرحد اور اسلام آباد سے جنرل اور خواتین کی نشستوں کے لیے اپنے اُمیدواروں کے کاغذات نامزدگی واپس لے لیے تھے۔

صوبہ سرحد میں ٹیکنوکریٹ کی نشست پر پاکستان مسلم لیگ کے سیکریٹری جنرل اقبال ظفر جھگڑا کامیاب ہوجائیں گے۔ اس لیے اس بات کا امکان ہے کہ اسلام آباد سے بھی جنرل نشست اور خواتین کی مخصوص نشست پر پاکستان پیپلز پارٹی کے اُمیدوار بلامقابلہ منتخب ہوجائیں گے۔

اس وقت تک پاکستان کے تین صوبوں جن میں صوبہ سندھ، پنجاب اور صوبہ سرحد میں سیاسی جماعتوں کے درمیان مفاہمت کے نتیجے میں وہاں سے بلامقابلہ سینیٹرز منتخب ہوئے ہیں تاہم صوبہ بلوچستان میں جوڑ توڑ کا سلسلہ جاری ہے۔