عبادالحق بی بی سی اردو ڈاٹ کام، لاہور

	آصف علی زرداری کو نہیں چاہئے کہ وہ کسی گورنر کے ہاتھوں ان کی تذلیل کرائیں:نواز شریف

نواز شریف نے سینچر کو مسلم لیگ نون کی مرکزی کونسل کے اجلاس سے خطاب کرتے ہوئے یہ بات کہی۔انہوں نے کہا کہ نااہلیت کی ایک تلوار ان کے سر اور دوسری ان کے بھائی شہباز شریف کے سر پر لٹکائی ہے لیکن اس سے انہیں کوئی فرق نہیں پڑتا۔

انہوں نے کہا کہ اگر عدالت انہیں نااہل قرار دے دیتی ہے تو انتخابات میں جب عوام ان کی جماعت کو ووٹ دے گی تو وجود میں آنے والی اسمبلی پہلے ہی روز اس فیصلے کو کالعدم قرار دے دے گی۔

نواز شریف کا کہنا ہے کہ آصف علی زرداری کو نہیں چاہیے کہ وہ کسی گورنر کے ہاتھوں ان کی تذلیل کرائیں۔

صدر آصف علی زداری نے انہیں کہا کہ سابق صدر جنرل پرویز مشرف کے تین نومبر کے اقدام کی توثیق کرنی ہوگی تاکہ انہیں استثنٰی مل جائے اور ان کو سزا نہ ہوسکے نوازشریف

نواز شریف نے انکشاف کیا کہ صدر آصف علی زداری نے انہیں کہا کہ سابق صدر جنرل پرویز مشرف کے تین نومبر کے اقدام کی توثیق کرنی ہوگی تاکہ انہیں استثنٰی مل جائے اور ان کو سزا نہ ہوسکے۔

ان کے بقول آصف علی زرداری نے ان سے کہا کہ وہ مشرف کے تین نومبر کے اقدامات کی توثیق کرنے کا وعدہ کرچکے ہیں۔

انہوں نے کہا کہ ’میں آصف زرداری سے کہا کہ آپ نے وعدہ کرنے سے پہلے ہم سے بات کیوں نہیں کی۔نواز شریف نے دو ٹوک کہا کہ وہ سیاست سے ہمیشہ کے لیے ریٹائر ہوجائیں گے لیکن کسی غیر قانونی اقدامات کی توثیق نہیں کریں گے‘۔

نواز شریف نے کہا کہ وکلاء کے دھرنے میں شمولیت پر رضامندی ظاہر کردی اور اب قوم کو دھرنے کی لاج رکھنی ہے۔انہوں نے اپنی جماعت کے کارکنوں سے کہا کہ وہ ان کی جانب نظریں جمائے بیٹھے ہیں ۔انہوں نے کہا کہ ہر ضلع میں ایک تعداد مقرر کی جائے گی جو اس دھرنے میں حصہ لے گی۔

انہوں نے اس عہد کا اظہار کیا کہ وہ عدلیہ کی بحالی کے لیے جدوجہد کو جاری رکھیں گے۔