دلاورخان وزیر بی بی سی اردو ڈاٹ کام، پشاور

	پولیس اور فوج کی مشترکہ گشت جاری ہے

ڈیرہ بنوں روڈ پر واقع کوٹلی امام میں سخت حفاظتی انتظامات میں ستائیس افراد کی اجتماعی نماز جنازہ ادا کی گئی۔شہر میں سخت کشیدگی پائی جاتی ہے۔

پولیس کا کہنا ہے کہ گزشتہ روز شیعہ فرقے سے تعلق رکھنے والے ایک شخص کے جنازے پر خودکش حملے میں ہلاک ہونے والوں کی تعداد اکتیس ہو گئی ہے۔

پولیس کے مطابق ہلاک ہونے والوں میں دو افراد سنّی اور ایک ہندو ہے جس کا نام وجے کمار بتایا جاتا ہے ۔وجے کمار ڈیرہ اسماعیل خان کا مقامی باشندہ بتایا جاتا ہے۔

پولیس کے ایک اہلکار نے بی بی سی کو بتایا کہ جنازے کے جلوس میں شامل چند افراد نے ایک مکان کے سامنے سنّی فرقے کے لوگوں پر فائرنگ کی جس کے نتیجہ میں ایک شخص ہلاک جبکہ تین زخمی ہوگئے ہیں۔انہوں نے کہا کہ شہر میں کرفیو بدستور موجود ہیں۔ لوگ گھروں میں محصور ہیں۔

ان کا کہنا تھا کہ پولیس نے شہر جانے والے تمام راستوں میں ناکے لگائے ہیں۔شہر کے اندر اور سرکلر روڈ پر پولیس اور فوج کی مشترکہ گشت بھی جاری ہے۔

پولیس حکام نے بی بی سی کو یہ بھی بتایا کہ ڈیرہ ہسپتال کے مرکزی دروازے پر پولیس بھی تعینات ہے اور کسی غیر متعلقہ شخص کو ہسپتال کے اندر جانے کی اجازت نہیں ہے۔

خیال رہے کہ ڈیرہ اسماعیل خان کو فرقہ وارانہ لحاظ سے حساس شہر تصور کیا جاتا ہے اور اہلِ تشیع کے ایامِ عزا کے حوالے سے شہر میں سخت حفاظتی انتظامات بھی کیے گئے ہیں۔