عبدالحئی کاکڑ بی بی سی اردو ڈاٹ کام، پشاور

	ڈیرہ اسماعیل خان کو فرقہ وارانہ لحاظ سے حساس شہر تصور کیا جاتا ہے

تاہم پولیس کا کہناہے کہ اس واقعہ میں صرف چھ افراد زخمی ہوئے ہیں۔

ڈیرہ اسماعیل خان کے پولیس آفسر میران شاہ نے بی بی سی کو بتایا کہ بم دھماکہ منگل کو شہر کے وسط میں واقع محلہ جنگویاں کی مدنی مسجد میں اس وقت ہوا ہے جب لوگ مغرب کی نماز پڑھنے میں مصروف تھے۔ان کے بقول اس واقعہ میں چھ افراد زخمی ہوگئے ہیں۔

ان کے مطابق یہ معلوم نہیں ہوسکا ہے کہ یہ دستی بم کا حملہ تھا یا اس سے پہلے ہی وہاں نصب کیا گیا تھا۔ مقامی صحافی اسلم اعوان دھماکے کے وقت مسجد میں موجود تھے۔ انہوں نے بی بی سی کو بتایا کہ وہ نماز پڑھ رہے تھے کہ کسی نے باہر سے ایک دستی بم پھینکا۔

ان کے بقول بم درورازے کے قریب تیسری صف میں کھڑے لوگوں کے قریب گرا جس میں انہوں نے دس افراد کو زخمی حالت میں دیکھا۔ان کے مطابق اس وقت مسجد میں تقریباً چالیس افراد موجود تھے۔

تاہم سول ہسپتال کے ایم ایس ڈاکٹر عاشق سلیم نے بی بی سی کو بتایا کہ ان کے پاس ایک لاش اور بیس کے قریب زخمی لائے گئے ہیں۔ ان کے بقول زخمیوں میں سے چار کی حالت نازک ہے۔