عزیزاللہ خان بی بی سی اردو ڈاٹ کام، کوئٹہ

	چارروز میں چوتھی گیس پائپ لائن کو دھماکے سے اڑایا گیا ہے

پولیس حکام کے مطابق لوٹی گیس فیلڈ سے پیر کوہ جانے والی اٹھارہ انچ قطر کی پائپ لائن کو دھماکہ سے اڑایا گیا ہے۔ یہ پائپ لائن سوئی پلانٹ کی سمت جاتی ہے۔

دریں اثناء اپنے آپ کو کالعدم تنظیم بلوچ ریپبلکن آرمی کا ترجمان ظاہر کرنے والے سرباز بلوچ نامی شخص نے ٹیلیفون پراپنی تنظیم کی جانب سے اس حملے کی ذمہ داری قبول کی ہے۔

چارروز میں چوتھی گیس پائپ لائن کو دھماکے سے اڑایا گیا ہے۔ جمعہ کے روز ڈیرہ اللہ یار میں ایک اٹھارہ انچ قطر کی پائپ لائن کو تباہ کر دیا گیا تھا جس کی مرمت کا کام اتوار کی صبح تک جاری تھا۔

کوئٹہ میں سوئی سدرن گیس کمپنی کے جنرل مینیجر مشتاق صدیقی نے بتایا ہے کہ اس پائپ لائن سے گیس کی ترسیل دوپہر کے بعد شروع کر دی جائے گی۔ یہ پائپ لائن سبی کے راستے کوئٹہ آتی ہے۔

کوئٹہ زیارت اور دیگر مصافاتی علاقوں میں تین روز سے گیس کی شدید قلت ہے جہاں ایک طرف برف باری کا سلسلہ جاری ہے اور درجہ حرارت نقطہ انجماد سے نیچے گر گیا ہے اور دوسری طرف ہیٹر اور چولہے ٹھنڈے پڑ گئے ہیں۔

اس کے علاوہ ڈیرہ بگٹی شہر میں مال منڈی میں موٹر سائیکل میں دھماکہ ہوا ہے لیکن پولیس کے مطابق اس دھماکے سے کسی قسم کا جانی نقصان نہیں ہوا ہے۔