ذیشان ظفر
بی بی سی اردو ڈاٹ کام، اسلام آباد |  |
| | ایک اندازے کے مطابق باجوڑ اور سوات سے تین لاکھ افراد بےگھر ہوئے ہیں |
قبائلی علاقے باجوڑ ایجنسی اور سوات کے مہاجرین نے کہا ہے کہ حکومت اسلام آباد میں ان کی عارضی خیمہ بستیاں ختم کرنے کی بجائے فوجی آپریشن بند کرے تاکہ وہ واپس اپنے گھروں کو جا سکیں۔ منگل کے روز اسلام آباد میں پارلیمنٹ لاجز کے سامنے باجوڑ ایجنسی اور صوبہ سرحد کے ضلع سوات کے مہاجرین نے مقامی انتظامیہ کی جانب سےان کی عارضی خیمہ بستیاں ختم کرنے کے فیصلے کے خلاف خاموش احتجاجی مظاہرہ کیا اور دھرنا دیا۔ مظاہرے میں شامل مہاجرین کے لیے کام کرنے والی ایک غیر سرکاری تنظیم ’ایم آئی ایف ٹی‘ کے سربراہ خورشید علی خان نے میڈیا سے بات کرتے ہوئے کہا کہ اسلام آباد کی انتظامیہ سکیورٹی رسک کو جواز بنا کر زبردستی انہیں خیمہ بستی ختم کرنے کا کہہ رہی ہے جس کی وجہ سے موسم سرما میں مہاجرین کی مشکلات میں مزید اضافہ ہو جائے گا۔ | جانوروں سے بدتر زندگی گزارنے پر مجبور  مظاہرے میں شامل ظاہر خان نے بتایا کہ باجوڑ ایجنسی میں فوجی آپریشن میں ان کا گھر بار سب کچھ تباہ ہو گیا اور نقل مکانی کر کے اسلام آباد آ گئے ہیں لیکن یہاں جانوروں سے بدتر زندگی گزارنے پر مجبور ہیں۔  |
انہوں نے کہا کہ اس سے پہلے مشیر داخلہ رحمان ملک کو ایک درخواست لکھی تھی کہ مہاجرین کے لیے خیمے مہیا کیے جائیں تاہم وعدوں کے باوجود ابھی تک کسی قسم کی کوئی مدد نہیں کی ہے اور اب انتظامیہ نے اچانک بے بس لوگوں کو ایک بار پھر سے بے گھر کرنے کا فیصلہ کیا ہے۔ انہوں نے کہا کہ ہماری سمجھ میں نہیں آتا کہ اگر حکومت افغانستان کے پناہ گزینوں کی رہائش فراہم کر سکتی ہے تو اس کے اپنے شہریوں کا کیا قصور ہے۔ تاہم اگر حکومت نے زبردستی مہاجرین کو خیمہ بستیوں سے بے دخل کرنے کی کوشش کی تو بھر پور احتجاج کیا جائے گا۔ مظاہرے میں شامل ظاہر خان نے بتایا کہ باجوڑ ایجنسی میں فوجی آپریشن میں ان کا گھر بار سب کچھ تباہ ہو گیا اور نقل مکانی کر کے اسلام آباد آ گئے ہیں لیکن یہاں جانوروں سے بدتر زندگی گزارنے پر مجبور ہیں۔ انہوں نے کہا کہ بڑی مشکل سے خیمہ بستی میں جگہ ملی تھی لیکن اب وہاں سے بھی نکالا جا رہے جبکہ مزدوری بھی بڑی مشکل سے ملتی ہے جس کی وجہ سے وہ کرایہ کا مکان بھی نہیں لے سکتے ہیں۔ اس لیے ہمارا حکومت سے مطالبہ ہے کہ باجوڑ میں فوجی آپریشن بند کیا جائے تاکہ ہم دوبارہ سے عزت کی زندگی گزار سکیں۔ ایک اور شخص محد رفیق نے بتایا کہ سوات میں فوج کی گولہ باری کی وجہ سے واپس نہیں جا سکتے ہیں اور یہاں ہمیں کوئی رہنے نہیں دیتا ہے۔ انہوں نے کہا کہ چھ ماہ سے کبھی گھر والوں کو کھانا ملتا ہے اور کبھی چھوٹے چھوٹے بچوں کو بھوکا سونا پڑتا ہے۔ لیکن پہلے کم از کم رات گزارنے کے لیے خیمہ تو موجود تھا تاہم اب لگتا ہے کہ وہ بھی نہیں رہے گا۔ جبکہ ابھی تک حکومت کے کسی بندے نے آ کر پوچھا تک نہیں کہ ہم کس حال میں زندگی گزار رہے ہیں۔ محمد رفیق نے کہا کہ اگر حکومت ہمیں یہاں رہنے کے لیے جگہ نہیں دے سکتی ہے تو اتنی مہربانی کرے کہ سوات میں فوجی آپریشن بند کر دے تاکہ ہم اپنے تباہ حال گھروں کو دوبارہ سے آباد کر سکیں۔ مظاہرے میں شامل تقریباً تمام لوگوں اس کوشش میں تھے کسی نہ کسی صحافی کو بتائیں کہ ہمارے علاقے میں فوجی آپریشن کے دروان ان کا کتنا نقصان ہوا اور کتنے عزیز ہلاک ہو چکے ہیں، اس کے علاوہ اپنے علاقے سے نقل مکانی کرنے کے بعد سے ان کو کن کن مشکالات کا سامنا کرنا پڑ رہا ہے۔ مظاہرین سے بات چیت کرنے والے اسلام آباد کے اسسٹنٹ کمشنر سکیرٹیریٹ شہباز طاہر ندیم نے بی بی سی بات کرتے ہوئے کہا کہ اسلام آباد کی مختلف خیمہ بستیوں میں رہائش پذیر لوگوں کی الگ الگ دیکھ بھال نہیں کی جا سکتی ہے۔ ایک سوال کے جواب میں انہوں نے کہا کہ خیمہ بستی سکیورٹی رِسک بھی ہوسکتی ہیں اور ان کے ارد گرد رہنے والے عام لوگوں کو مشکلات بھی پیش آسکتی ہیں۔ انہوں نے کہا کہ ان مہاجرین کو اسلام آباد سے باہر ترنول کے مقام پر پہلے سے موجود خیمہ بستی میں بسانے کے لیے انتظامات کیے جا رہے ہیں۔ واضع رہے کہ غیر سرکاری تنظیموں کے مطابق قبائلی علاقے باجوڑ ایجنسی اور صوبہ سرحد کے ضلع سوات میں فوجی آپریشن کی وجہ سے تین لاکھ سے زائد افراد نقل مکانی کرنے پر مجبور ہوئے ہیں جو مختلف خیمہ بستیوں میں مندگی گزار رہے ہیں۔ | 
باجوڑ: قبائل اور حکومت میں معاہدہ
