عبادالحق بی بی سی اردو ڈاٹ کام، لاہور

	چودھری شجاعت حسین نے کہا کہ بھارت کو بغیر ثبوت الزام تراشی نہیں کرنی چاہیے

انہوں نے یہ مطالبہ سنیچر کی رات پریس کانفرنس سے خطاب کرتے ہوئے کیا۔ چودھری شجاعت حسین نے بتایا کہ وزیر اعظم یوسف رضا گیلانی نے انہیں ٹیلی فون کیا تھا جس پر انہوں نے وزیر اعظم سے کہا کہ وہ تمام سیاسی جماعتوں کےقائدین کو بلاکر ان سے بات کریں اور عوام کو اعتماد میں لیں۔

انہوں نے کہا کہ ماضی میں بھی بھارت پاکستان پر الزام لگاتا رہا ہے۔انہوں نے مزید کہا کہ جب بھارتی پارلیمنٹ اور سمجھوتہ ایکسپریس پر حملوں کا الزام بھی پاکستان پر لگایا گیا جو بعد میں غلط ثابت ہوا۔

چودھری شجاعت حسین نے کہا کہ بھارت کو بغیر ثبوت الزام تراشی نہیں کرنی چاہیے اور ان کے بقول امریکہ کواپنا اثرورسوخ استعمال کرتے ہوئے بھارت کو الزام تراشی سے روکنا چاہیے۔

ایک سوال پر انہوں نے کہا کہ آئی ایس آئی کے سربراہ کو بھارت بھیجنے کا جو فیصلہ کیا گیاتھا وہ درست نہیں تھا۔

ایک اور سوال پر چودھری شجاعت کا کہنا ہے کہ نیشنل سیکیورٹی کونسل پارلیمنٹ کے ایکٹ کے ذریعے وجود میں آئی تھی اور پارلیمنٹ ہی اسے ختم کرسکتی ہے۔ ان کے بقول اصولی طور پر ابھی نیشنل سیکیورٹی کونسل ختم نہیں ہوئی ہے۔انہوں نے تجویز دی کہ سیکیورٹی کونسل فعال اور موثر بنایا جائے۔