اعجاز مہر بی بی سی اردو ڈاٹ کام، اسلام آباد

	حملہ آوروں کا کراچی سے ’کنکشن‘ ثابت ہوا ہے: بھارتی وزیر اعظم

یہ بات وزیراعظم کے پریس سیکرٹری زاہد بشیر نے جمعہ کو بی بی سی سے بات کرتے ہوئے کہی اور بتایا کہ وزیراعظم سید یوسف رصا گیلانی نے اپنے بھارتی ہم منصب سے فون پر بات کرتے ہوئے انہیں یہ یقین دہانی کرائی ہے۔

جمعہ کو پاکستان کےصدر آصف علی زرداری اور وزیراعظم سید یوسف رضا گیلانی نے بھارت کے وزیراعظم سے علیحدہ علیحدہ فون پر بات کی اور ممبئی دھماکوں پر اظہار افسوس کیا۔ دونوں رہنماؤں نے بھارتی وزیراعظم کو حملہ آوروں کو پکڑنے میں تعاون کا یقین دلایا۔

وزیراعظم کے پریس سیکرٹری کے مطابق بھارتی وزیراعظم نے ممبئی حملوں کے ابتدائی شواہد کے متعلق وزیراعظم گیلانی کو مطلع کیا اور کہا کہ حملہ آوروں کا کراچی سے ’کنکشن‘ ثابت ہوا ہے۔

ان کے مطابق وزیر اعظم گیلانی نے اپنے بھارتی ہم منصب کو اپنی حکومت کے مکمل تعاون کا یقین دلاتے ہوئے کہا کہ شواہد کا جائزہ لینے اور تفتیش میں تعاون کے لیے طریقہ کار کا تعین کرنے کے بعد آئی ایس آئی کے سربراہ کو بھارت روانہ کریں گے۔

بھارتی وزیراعظم سے فون پر بات کرنے کے بعد وزیراعظم یوسف رضا گیلانی نے ایوان صدر میں آصف علی زرداری سے ملاقات کر کے اس بارے میں مشاورت بھی کی۔

’حیرانی ہوئی‘  صدر آصف زرداری نے بھارتی وزیر اعظم سے بات کرتے ہوئے کہا ہے کہ ممبئی سانحہ سے انہیں سخت صدمہ پہنچا اور حیرانی ہوئی اور اس سے ان کے وہ زخم تازہ ہوگئے جو انہیں بینظیر بھٹو کی شدت پسندوں کے ہاتھوں ہلاکت سے لگے تھے۔ صدر آصف زرداری

’غیر ریاستی عناصر حکومتوں پر اپنا ایجنڈا مسلط کرنا چاہتے ہیں مگر انہیں کسی قیمت پر کامیاب ہونے نہیں دیا جائےگا اور انہیں شدت پسندوں کے جال میں نہیں پھسنا چاہیے۔‘

صدر نے کہا کہ پاکستان حکومت ممبئی حملوں کے مجرموں اور ان کے سرغنہ کو بے نقاب کرنے اور انہیں گرفتار کرنے میں بھارتی حکومت سے مکمل تعاون کرے گی۔

یہ پہلا موقع ہے کہ بھارتی حکومت نے براہ راست حکومت پاکستان یا کسی ریاستی ادارے پر الزام نہیں لگایا اور پاکستان کو شواہد پیش کرنے اور تعاون فراہم کرنے کی درخواست کی ہے۔