ذیشان ظفر بی بی سی اردو ڈاٹ کام، اسلام آباد

	میں اپنے دل میں شک و شبہات نہیں ڈالنا چاہتا: نواز شریف

میاں نواز شریف نے سوموار کے روز اسلام آباد میں میڈیا سے بات کرتے ہوئے کہا کہ ان کے دل میں ابھی بھی گلہ ہے کہ صدر آصف زرداری نے عدلیہ کی بحالی کے حوالے سے کیے گئے اپنے وعدہ پورے نہیں کیے ہیں لیکن پھر حکومت کے ساتھ اپنا تعاوں جاری رکھیں گے۔

گلہ برقرار  دل میں ابھی بھی گلہ ہے کہ صدر آصف زرداری نے عدلیہ کی بحالی کے حوالے سے کیے گئے اپنے وعدہ پورے نہیں کیے ہیں۔ نواز شریف

میاں نواز شریف نے بتایا کہ سترہویں ترمیم کے خاتمے کے لیے وہ بل پارلیمنٹ میں پیش کر سکتے ہیں لیکن وہ حکومت کے منتظر ہیں کہ وہ پہل کرتےہوئے بل پارلیمنٹ میں پیش کریں۔

اس موقع پر انھوں نے سنیچر کے روز صدر آصف علی زرداری سے ایوان صدر میں ہونے والی ملاقات کے بارے میں کہا کہ پاکستان کے قبائلی علاقوں کی صورتحال کے علاوہ میثاق جمہوریت اور سترہویں ترمیم کے خاتمے کے لیے بات چیت کی گئی تھی۔

تعاون کہاں پر؟  موجودہ معاشی بحران سے نمٹنے اور قبائلی علاقوں میں ان و امان کے لیے حکومت سے غیر مشروط تعاون کیا جائے گا نواز شریف

نواز شریف نے کہا کہ قومی سلامتی سے متعلق منظور ہونے والی قراداد پر عمل درآمد کے لیے ارکان پارلیمنٹ کی کمیٹی بنانے میں تاخیر کی گئی ہے تاہم اب کمیٹی کو مکمل ذمہ دار بنایا جائے کہ وہ قبائلی علاقوں کے تمام عناصر سے بات چیت کر کے کوئی حل تلاش کرے۔

اس سوال کے جواب میں کہ پیپلزپارٹی وفاق میں حکومت سازی کے لیے مسلم لیگ ق سے رابطے کر رہی ہے نواز شریف نے کہا کہ آپ جو مرضی کہہ دیں میں اپنے دل میں شک و شبہات نہیں ڈالنا چاہتا ہوں۔