شہزاد ملک بی بی سی اردو ڈاٹ کام، اسلام آباد

	صدر زرداری ایک اہم اجلاس کی صدارت کر رہے تھے

سنیچر کوایوان صدر میں ایک اہم اجلاس کی صدارت کرتے ہوئے صدر آصف علی زرداری نے کہا کہ ریاست کے اندر ریاست بنانے کی اجازت نہیں دی جائے گی اور صرف اُن افراد کےساتھ مذاکرات کیے جائیں گے جو ہتھیار پھینک کر حکومت کی عملداری کو تسلیم کریں گے تاہم حکومت شدت پسندوں کے ہاتھوں بلیک میل نہیں ہوگی۔

صدر زرداری نے متعلقہ ادروں کو ہدایت کی کہ سوات اور دیگر علاقوں میں ترقیاتی عمل کو تیز کیا جائے۔

اجلاس میں قبائلی علاقوں اور سوات میں شدت پسندوں کے خلاف جاری آپریشن کے بارے میں تبادلہ خیال کیا گیا۔

سیکریٹری داخلہ کمال شاہ نےاجلاس کے شرکاء کو شدت پسندوں کے خلاف جاری آپریشن کے بارے میں بریفنگ دی۔

اجلاس میں قبائلی علاقوں سے تعلق رکھنے والے ارکان پارلیمنٹ اور صوبہ سرحد کی اسمبلی کے کچھ ارکان بھی موجود تھے۔

اجلاس میں فیصلہ کیا گیا کہ ان علاقوں میں شدت پسندوں کے خاتمے تک آپریشن جاری رہے گا اور ملکی سالمیت کے دشمنوں کے ساتھ کوئی رعایت نہیں برتی جائے گی۔

صدر زرداری نے صوبائی حکومت کو امن وامان کی بحالی کے لیے ہر ممکن امداد کا یقین دلایا۔

اجلاس میں صوبہ سرحد کی پولیس کو جدید خطوط پر استوار کرنے کے بارے میں بھی متعدد فیصلے کیے گئے۔ اجلاس میں قبائلی علاقے میران شاہ میں امریکی طیاروں کی بمباری پر شدید افسوس کا اظہار کیا گیا اور صدر کا کہنا ہے کہ پاکستانی علاقوں میں شدت پسندوں کے خلاف کارروائی کا حق صرف پاکستانی فوج کے پاس ہے۔

اُدھر پارلیمانی امور کے وفاقی وزیر بابر اعوان کا کہنا ہے کہ حکومت دہشت گردی کے خلاف جنگ کے حوالے سے پارلیمنٹ کی متفقہ قرارداد پر عملدرآمد کرنے پر لیت ولعل سے کام نہیں لے رہی۔

اپنے دفتر میں میڈیا کے نمائندوں سے گفتگو کرتے ہوئے انہوں نے کہا کہ پارلیمنٹ میں سیاسی جماعتوں کے پارلیمانی لیڈروں نے اس قرارداد پر عملدرآمد کے سلسلے میں کمیٹی کی تشکیل کے لیے اپنی اپنی جماعتوں کے ارکان کے نام سپیکر قومی اسمبلی کو دئیے ہیں۔ انہوں نے کہا کہ اس کمیٹی کا قیام جلد عمل میں آئے گا۔