دلاور خان وزیر بی بی سی اردو ڈاٹ کام، پشاور

	قومی لشکر نے مقامی کمانڈر سمیت کئی دوسرے جنگجوؤں کے گھروں کو نذر آتش کیا

اطلاعات کے مطابق مقامی طالبان اور قبائلی لشکر کے درمیان تصادم کا کوئی خطرہ نہیں ہے۔

باجوڑ ایجنسی کی مقامی پولیٹکل انتظامیہ کا کہنا ہے کہ تحصیل وڑہ ماموند کے علاقے میں مقامی طالبان کے خلاف قومی لشکر کی کارروائی بدستور جاری ہے۔ جس میں ہزاروں کی تعداد میں مسلح مقامی قبائل حصہ لے رہے ہیں۔ حکام کے مطابق پیر کو لشکر نے ایک مقامی کمانڈر جان والی عرف شینہ سمیت کئی دوسرے شدت پسندوں کے گھروں کو نذر آتش کیا ہے۔

مقامی لوگوں کے مطابق پیر کو باجوڑ قومی لشکر کے مسلح رضاکار تحریک طالبان پاکستان کے ترجمان مولوی عمر اور باجوڑ ایجنسی کے امیر فقیر محمد کے گھر تک پہنچ گئے تھے۔ لیکن وہاں کچھ مقامی طالبان کی شدت پسندوں سے بات چیت کے بعد مقامی طالبان علاقے سے چلے گئے۔ لشکر کیساتھ تصادم کا خطرہ ٹل گیا ہے اور مقامی لوگوں کے مطابق آئندہ بھی طالبان شدت پسندوں اور لشکر کے درمیان تصادم کا کسی قسم کا خطرہ موجود نہیں ہے۔

قومی لشکر کے مسلح رضاکار تحریک طالبان پاکستان کے ترجمان مولوی عمر اور باجوڑ ایجنسی کے امیر فقیر محمد کے گھر تک پہنچ گئے تھے۔ لیکن وہاں کچھ مقامی طالبان کے شدت پسندوں سے بات چیت کے بعد مقامی طالبان علاقے سے چلے گئے۔ مقامی لوگ

باجوڑ ایجنسی میں مقامی طالبان کے علاوہ ایک افغان طالبان کمانڈر قاری ضیاءالرحمن کا بھی ایک گروپ علاقے میں سرگرم ہے۔ مقامی لوگوں کے مطابق ضیاءالرحمن گروپ میں ایک ہزار سے زیادہ افغان شدت پسند شامل ہیں۔

مقامی لوگوں کا کہنا ہے کہ مقامی طالبان اور افغان طالبان کے درمیان اس بات پر کچھ اختلافات سامنے آئے تھے کہ قومی لشکر کے سامنے علاقہ نہیں چھوڑیں گے۔ لیکن مقامی طالبان نے افغان طالبان کو اس بات پر مجبور کردیا کہ وہ قومی لشکر کساتھ تصادم کرنا نہیں چاہتے ہیں۔

یاد رہے کہ جنوبی شمالی وزیرستان میں بھی مقامی طالبان قومی لشکر کے سامنے کچھ کرنا نہیں چاہتے تھے۔ جب کوئی مقامی طالبان کمانڈر کے گھر کو جلادیا جاتا تھا تو پہلے سے ان کو معلوم ہوتا تھا۔ اکثر اوقات دو دن پہلے وہ اپنے گھروں کو خالی کردیتے تھے۔