دلاور خان وزیر بی بی سی اردو ڈاٹ کام، ڈیرہ اسماعیل خان

	ماضی میں امریکی طیاروں کی بمباری کا نشانہ زیادہ تر عام شہری بنے تھے

دوسری طرف افغان سرحد کے قریب امریکی گن شپ ہیلی کاپٹر کے حملے میں بھی تین افراد مارے گئے ہیں۔

مقامی انتظامیہ کے ذرائع کا کہنا ہے کہ جمعہ کی شام دس بجے کے قریب شمالی وزیرستان کے صدر مقام میرانشاہ سے کوئی پچیس کلومیٹر دور مغرب کی جانب علاقے لانڈے محمد خیل میں داؤد جان اور عبدالرحمن کے گھروں کو امریکی جاسوس طیاروں نے نشانہ بنایا۔ جس کے نتیجے میں پندہ افراد ہلاک جبکہ متعدد زخمی ہوگئے۔ ہلاک ہونے والوں میں دس مقامی طالبان بھی شامل ہیں۔

مقامی لوگوں کے مطابق داؤد جان اور عبدالرحمن دو بھائی ہیں جن کا تعلق افغانستان کے علاقے خواست میں تانڑئی قبیلے سے بتایا جاتا ہے جو تیس سال سے یہاں مقیم تھے۔

مقامی لوگوں نے بی بی سی کو بتایا کہ داؤد جان کا مقامی طالبان سے تعلق تھا اور ان کے گھر میں ہروقت مقامی طالبان اور افغان طالبان آتے جاتے تھے۔

ایک عینی شاہد نے بی بی سی کو بتایا کہ میزائل حملے کے وقت مقامی طالبان کا داؤد جان کے گھر میں کھانے کا پروگرام تھا۔انہوں نے کہا کہ عبدالرحمن کے گھر میں دوخواتین اور ایک بچہ ہلاک ہوگیا ہے۔

مقامی لوگوں نے بتایا کہ حملے کے بعد مقامی طالبان نے پورے علاقے کو گھیرے میں لے لیا ہے اور کسی کو علاقے میں جانے کی اجازت نہیں ہے۔انہوں نے کہا کہ دوسرے علاقے سے مقامی طالبان لاشوں کو ملبےسے نکالنے کے لیے محمد خیل پہنچ گئے ہیں۔

مقامی لوگوں کا کہنا ہے کہ اس کے علاوہ شام چھ بجے سرحد کے قریب خارسین میں امریکی گن شپ ہیلی کاپٹر نے فائرنگ کی جس کے نتیجے میں تین افراد ہلاک ہوگئے ہیں۔

مقامی لوگوں کا کہنا ہے کہ افغانستان کے علاقے تانڑئی میں امریکی کارروائی جاری تھی کہ پاکستان کے علاقے میں بھی ایک گھر نشانہ بنا۔انہوں نے کہا کہ امریکی گن شپ ہیلی کاپٹر کی فائرنگ سے چھ افرد زخمی بھی ہوگئے ہیں جن کو ایک نجی ہسپتال میں داخل کرا دیا گیا ہے۔

اس سے قبل خبر رساں ادارے رائٹرز سے بات کرتے ہوئے پاکستان فوج کے ترجمان میجر جنرل اطہر عباس نے کہا تھا یہ حملہ پاکستان کی حدود میں نہیں کیا گیا۔

انہوں نے کہا تھا کہ یہ شدت پسندوں کے خلاف بین الاقوامی فوج کا آپریشن تھا اور افغانستان کی سرحد کے اندر کیا گیا تھا۔