آصف فاروقی بی بی سی ارودڈاٹ کام، اسلام آْباد

	اٹک کا ضلع دریائے سندھ کے کنارے پر واقع ہے

پولیس کا کہنا ہے کہ تیل کی تلاش کرنے والی غیر ملکی کمپنی کے انجینئر کا تعلق پولینڈ سے ہے۔

وفاقی دارالحکومت اسلام آباد اور صوبہ سرحد کے درمیان واقع ضلع اٹک کے تھانہ بسال کے ایک افسر کے مطابق یہ واقعہ صبح سات بجے کے قریب پیش آیا جب جیو فزیکل نامی کمپنی سے تعلق رکھنے والے یہ لوگ راولپنڈی سے کوہاٹ جانے والی سڑک کے قریب زمینی سروے کر رہے تھے۔

اس علاقے میں یہ کمپنی کچھ عرصے سے اپنا کیمپ آفس قائم کئے ہوئے تھی اور تیل کی تلاش کے لئے زمین کا جائزہ لیا جا رہا تھا۔

تھانہ بسال کے محرر کے مطابق صبح سات بجے کے قریب چند نامعلوم افراد نے فیلڈ میں کام کرنے والے ان افراد پر حملہ کیا جس میں فرنٹئیر کانسٹیبلری سے تعلق رکھنے والا محافظ اور مزید دو افراد ہلاک ہو گئے جبکہ پولینڈ سے تعلق رکھنے والے پیٹر سٹام زک کو اغوا کر لیا گیا۔

اعلیٰ پولیس افسران موقع پر پہنچ گئے اور عینی شاہدین کے ذریعے اغوا کاروں کے بارے میں معلومات اکٹھی کرنے کی کوشش کی جا رہی ہے۔