رفعت اللہ اورکزئی بی بی سی اردو ڈاٹ کام، پشاور

	اس اغواء میں مذہبی عناصر کے ملوث ہونے کا الزام نہیں لگایا جا رہا

دوسری طرف مغوی کے صاحبزادے سینیٹر حافظ رشید احمد کا کہنا ہے کہ ان کے والد کے اغواء میں مذہبی عناصر نہیں بلکہ جرائم پیشہ افراد ملوث ہوسکتے ہیں۔

بدھ کو بی بی سی سے بات کرتے ہوئے سینیٹر حافظ رشید احمد نے
کہا کہ ان کے والد کے ہمراہ سفر کرنے والے محافظوں کے مطابق مولانا غلام محمد صادق گزشتہ روز انتخابی مہم کے سلسلے میں مہمند ایجنسی کے علاقے آنبار سے واپس آرہے تھے کہ گڑنگ کے علاقہ میں گھات لگائے کچھ مسلح افراد نے ان کی گاڑی کو روکا اور انہیں زبردستی دوسری گاڑی میں بیٹھا کر کسی نامعلوم مقام کی طرف اپنے ساتھ لے گئے۔ ان کے مطابق اغواء کار راکٹ لانچرز اور دیگر بھاری اسلحہ سے لیس تھے جبکہ ان کے ساتھ دو موٹر سائیکل سوار بھی تھے۔

انہوں نے کہا کہ مولانا غلام صادق کی گاڑی میں ان کے ساتھ سکیورٹی گارڈز اور کچھ اور لوگ بھی تھے لیکن اغواء کاروں نے انہیں کچھ نہیں کہا، صرف مولانا صاحب کو گاڑی میں بٹھاکر نامعلوم مقام کی طرف چلے گئے۔

انہوں نے کہا کہ ان کے والد کے اغواء کے بعد ان سے کسی نے رابط نہیں کیا ہے اور نہ یہ معلوم ہورہا کہ یہ کام کس نے کیا ہے اور کس مقصد کےلئے کیا ہے۔

ایک سوال کے جواب میں سینیٹر حافظ رشید کا کہنا تھا کہ یہ کام مقامی طالبان یا مذہبی عناصر کا نہیں ہوسکتا بلکہ اس میں جرائم پیشہ لوگ ملوث ہوسکتے ہیں۔

انہوں نے کہا کہ ’مہمند ایجنسی میں طالبان تحریک میں شامل نوے فیصد افراد مولانا صاحب کے شاگرد رہے ہیں پھر وہ اپنے استاد کو کیسے اغواء کرسکتے ہیں، اس لئے یہ طالبان کا کام نہیں ہوسکتا۔‘

ادھر یہ بھی اطلاعات ہیں کہ مہمند ایجنسی کے مقامی طالبان نے اس اغواء سے لاعلمی کا اظہار کیا ہے۔

مولانا غلام محمد صادق کا تعلق جمیعت علماء اسلام (ف) سے بتایا جاتا ہے۔ وہ سن دو ہزار دو کے الیکشن میں بھی مہمند ایجنسی سے قومی اسمبلی کے رکن منتخب ہوئے تھے جبکہ ان کے صاحبزادے حافظ رشید احمد ایوان بالا کے رکن ہیں۔

واضح رہے کہ گزشتہ کچھ عرصہ سے مہمند ایجنسی میں امن و امان کی صورتحال انتہائی خراب رہی ہے اور مذہبی عناصر کے اثر رسوخ میں اضافہ دیکھنے میں آیا ہے۔