آصف فاروقی بی بی سی اردو ڈاٹ کام، اسلام آباد

	صدر زرداری اپنے وزراء کے ساتھ اس اہم مشاورت کے بعد وزیر اعظم یوسف رضا گیلانی کے ہمراہ وزارت خارجہ جائیں گے

صدر زرداری اپنے وزراء کے ساتھ اس اہم مشاورت کے بعد وزیر اعظم یوسف رضا گیلانی کے ہمراہ وزارت خارجہ جائیں گے جہاں سیکرٹری خارجہ اور دیگر متعلقہ افسران سربراہ مملکت اور حکومت کو خارجہ امور کے بارے میں بریفنگ دیں گے۔

وزارت خارجہ میں ہونے والی اس بریفنگ کے بعد سوال و جواب کے لئے بھی وقت مختص کیا گیا ہے جس میں صدور دفتر خارجہ کے افسران مہمان کے ساتھ بے تکلفی کے ساتھ مختلف موضوعات پر تفصیلی تبادلہ خیال کرتے ہیں تاکہ طرفین کو ایک دوسرے کو سمجھنے کا زیادہ سے زیادہ موقع مل سکے۔

پیپلز پارٹی کے شریک چیئرمین کے مسند صدارت سنبھالنے کے بعد پہلے روز کی مصروفیات اس بات کی نشاندہی کرتی ہیں کہ مخلوط حکومت نے چھ ماہ کی سست روی کے بعد بلآخر قومی معاملات پر تیز رفتار پالیسی سازی کی راہ اپنانے کا فیصلہ کیا ہے۔

ان دنوں میں پیپلز پارٹی کی حکومت کو بعص حلقوں کی جانب سے اہم قومی معاملات جن میں معیشت اور خارجہ امور سرفہرست ہیں، پر فیصلہ سازی سے گریز پر تنقید کا نشانہ بناتے رہے ہیں۔

ایوان صدر میں ملاقات کے لئے آنے والے وزرا کو اپنی اپنی وزارت کے بارے میں اہم پالیسی امور سے متعلق بریف ہمراہ لانے کا کہا گیا ہے۔

دن کے گیارہ بجے شروع ہونے والی اس ملاقات میں وزیراعظم سمیت بعض وزرا کچھ دیر بعد شریک ہوں گے کیونکہ اس دوران اقتصادی رابط کمیٹی کا اجلاس بھی جاری ہے۔

کابینہ کی اس اہم کمیٹی کا اجلاس منگل کے روز صدارتی حلف برداری کی تقریب کے باعث ایک روز کے لئے ملتوی کر دیا گیا تھا۔ کابینہ ڈویژن کے ذرائع کے مطابق اقتصادی رابطہ کمیٹی کا اجلاس نہ ہونے کے باعث آج وفاقی کابینہ کا اجلاس بھی نہیں ہو سکے گا۔

وفاقی کابینہ کا اجلاس ہر دوسرے ہفتے بدھ کے روز منعقد کیا جاتا ہے۔

ذرائع کا کہنا ہے کہ میڈیا میں پایا جانے والا یہ تاثر درست نہیں کہ وفاقی وزرا کی صدر مملکت کے ساتھ ملاقات کے باعث کابینہ کا اجلاس منسوخ کیا گیا ہے بلکہ حقیقیت اسکے برعکس یہ ہے کہ کابینہ کا اجلاس نہ ہونے کے وجہ سے وزراء کو ایوان صدر طلب کیا گیا ہے۔