آصف فاروقی بی بی سی ارودڈاٹ کام، اسلام آباد

صوبہ سرحد کی حکومت کی جانب سے یہ درخواست سینئر وکیل عبدالحفیظ پیرزادہ نے دائر کی تھی جس میں مؤقف اختیار کیا گیا تھا کہ پشاور الیکٹرک سپلائی کمپنی سوموار سے صوبہ سرحد کے صارفین کے لیے بجلی کے نرخوں میں اکتیس فیصد اضافہ کرنے والی ہے جو ناجائز ہے اور اسے روکا جائے۔

درخواست کے حق میں دلائل دیتے ہوئے سرحد حکومت کے وکیل عبدالحفیظ پیرزادہ نے کہا کہ بجلی کے نرخ پہلے ہی کافی ہیں اس صورت میں ان میں مزید اضافے مہنگائی میں اضافے کا باعث بنے گا اور غریب آدمی پر ناقابل برداشت بوجھ پڑے گا۔

اسلام آباد ہائیکورٹ کے چیف جسٹس سردار محمد اسلم پر مشتمل عدالت نے عبدالحفیظ پیرزادہ کی جانب سے اس اضافے کے خلاف مقدمے کی سماعت کے دوران حکم امتناعی جاری کرنے کی درخواست منظور کرتے ہوئے وفاقی حکومت اور بجلی کی قیمت کا تعین کرنے والے مرکزی ادارے نیپرا کو چوبیس ستمبر تک جواب دائر کرنے کے نوٹس جاری کر دیئے ہیں۔

نیپرا کی سفارش پر وفاقی حکومت نے ملک بھر میں بجلی کے نرخوں میں اکتیس فیصد اضافے کا اعلان کیا تھا تاہم اس پر عملدرآمد چاروں صوبوں میں بجلی کی ترسیل کے ادارے اپنے طور پر کرنے کے مجاز ہیں۔

اسلام آباد ہائیکورٹ کے اس فیصلے کا اطلاق صرف صوبہ سرحد کے صارفین کے لیے ہوگا جبکہ دیگر صوبوں میں بھی اسی نوعیت کی درخواستیں متعلقہ ہائیکورٹس میں زیر سماعت ہیں۔