آصف فاروقی بی بی سی اردو ڈاٹ کام، اسلام آباد

	راجہ پرویز اشرف اسلام آباد میں صحافیوں سے بات کر رہے تھے

اسلام آباد میں ایک پریس کانفرنس سے خطاب کرتے ہوئے راجہ پرویز اشرف نے کہا کہ ملتان کو بجلی کی فراہمی کے ادارے میپکو پر حملے سے پہلے عوامی نمائندوں کے ساتھ میپکو افسران کے مذاکرات کامیابی کے ساتھ مکمل ہو چکے تھے کہ اچانک نا معلوم افراد نے سرکاری اور نجی املاک کی توڑ پھوڑ شروع کر دی۔ انہوں نے کہا کہ اس توڑ پھوڑ میں وہ لوگ ملوث ہیں جنہوں نے نو سال کے دوران ملک کو اندھیروں میں دھکیلنے کا بندوبست کیا۔

ملتان: لوڈ شیڈنگ پر شدید احتجاج، ہنگامہ آرائی

راجہ پرویز اشرف کا کہنا تھا کہ واپڈا کے دفتر پر حملہ جمہوری حکومت اور خود جمہوریت کے خلاف سازش ہیں جس میں ملوث عناصر کو وہ خوب پہچانتے ہیں۔ انہوں نے تنبیہ دیتے ہوئے کہا کہ یہ عناصر ان جمہوریت مخالف سازشوں سے باز آجائیں ورنہ حکومت ان کے ساتھ آہنی ہاتھوں سے نمٹے گی۔

وفاقی وزیر نے کہا کہ حکومت کو معلوم ہے کہ یہ سازشی عناصر اس طرح کے مزید واقعات کرنے کی کوشش کریں گے تاہم انہوں نے عوام سے اپیل کی کہ وہ پر امن رہیں اور ان عوامل کی سازشوں سے با خبر رہیں۔

حکومت نے بجلی کے بحران پر قابو پانے کے لیے تین طرح کے اقدامات پر عمل کرنا شروع دیا ہے جن میں ایمرجنسی پلان اور وسط اور طویل مدتی پروگرام شامل ہیں۔ وفاقی وزیر برائے پانی و بجلی

انہوں نے کہا کہ موجودہ صورتحال میں جتنی بجلی دستیاب ہے وہ سولہ گھنٹے کے استعمال کے لیے کافی ہے یعنی باقی آٹھ گھنٹے کے لیے بجلی موجود نہیں ہے۔

پانی و بجلی کے وفاقی وزیر نے کہا کہ حکومت نے بجلی کے بحران پر قابو پانے کے لیے تین طرح کے اقدامات پر عمل کرنا شروع دیا ہے ان میں ایمرجنسی پلان اور وسط اور طویل مدتی پروگرام شامل ہیں۔ ایمرجنسی پروگرام کے تحت بجلی کی بچت کے منصوبے شروع کیے جا رہے ہیں جس کے تحت کاروباری مراکز کو جلد بند کرنے اور ہفتے میں دو روزہ چھٹی کرنے کی تجاویز پر مختلف محکموں اور تنظیموں سے تجاویز طلب کر لی گئی ہیں اور اس بارے میں حتمی فیصلہ بہت جلد کر لیا جائے گا۔ اس دوران وفاقی وزیر نے کہا کہ بجلی کی لوڈشیڈنگ جاری رہے گی جس میں شہری دیہاتی یا امیر غریب کی تفریق نہیں کی جائے گی۔

راجہ پرویز اشرف نے کہا کہ بجلی کی لوڈشیڈ نگ کے اوقات طے کرنے کے لیے ضلعوں کی سطح پر لوڈمینیجمنٹ کمیٹیز بنائی جائیں گی۔ اس کمیٹی میں واپڈا افسران کے علاوہ منتخب نمائندے اور کاروباری تنظیموں کے ارکان بھی شامل ہوں گے تاکہ اتفاق رائے سے لوڈشیڈنگ کا وقت طے کیا جا سکے۔

انہوں نے کہا کہ وسط مدتی منصوبے کے تحت اگلے ایک برس میں کرائے کے بجلی گھروں سے دوہزار میگا واٹ بجلی کا حصول شروع ہو جائے گا جبکہ تین برس میں ملک سے لوڈ شیڈنگ کا مکمل خاتمہ کر دیا جائے گا۔ تاہم انہوں نے کہا کہ اس دوران بڑے ڈیم بنانے کا کوئی منصوبہ زیر غور نہیں ہے۔