ارمان صابر بی بی سی اردو ڈاٹ کام، کراچی

	رقیہ سومرو نے سٹریچر پر لیٹے لیٹے ہی اپنا ووٹ ڈالا

پیپلزپارٹی کی رقیہ سومرو کو گھٹنوں کا مرض ہے اور ان کا آپریشن چند روز قبل ایک مقامی ہسپتال میں کیا گیا ہے جہاں وہ داخل ہیں۔ ڈاکٹروں نے ابھی انہیں بستر سے اٹھنے سے بھی منع کیا ہے تاہم وہ اپنا ووٹ ڈالنے کے لیے سٹریچر پر سندھ اسمبلی پہنچیں۔

جیسے ہی ان کو سٹریچر پر اٹھائے افراد اسمبلی ہال میں داخل ہوئے تو ارکان اسمبلی اپنی نشستوں سے کھڑے ہوگئے اور ڈیسک بجا کر ان کی حوصلہ افزائی کی اور پھر فوراً ہی ہال ’زندہ ہے بی بی زندہ ہے‘ کے نعروں سے گونج اٹھا۔

رقیہ سومرو نے سٹریچر پر لیٹے لیٹے ہی اپنا ووٹ ڈالا اور پریذائیڈنگ افسر اپنی سیٹ سے اٹھ کر ان کا ووٹ ڈلوانے ان کی مدد کرنے ان کے پاس آئے۔

ووٹ ڈالنے کے بعد انہوں نے صحافیوں سے بات کرتے ہوئے کہا کہ جب ان کی قائد بے نظیر بھٹو جمہوریت کے لیے اپنی جان قربان کر سکتی ہیں تو وہ اس حالت میں ووٹ ڈالنے کیوں نہیں آ سکتیں۔ انہوں نے کہا کہ وہ ہسپتال کے بستر سے جمہوریت کی سربلندی کے لیے ووٹ ڈالنے آئی ہیں۔

صدارتی انتخابات کے لیے سندھ اسمبلی میں سنیچر کو پولنگ صبح دس بج کر دس منٹ پر شروع ہوئی اور پہلا ووٹ پاکستان پپلزپارٹی سے تعلق رکھنے والے عبدالحق بھرٹ نے ڈالا۔ سندھ اسمبلی میں جسٹس انور ظہیر جمالی کو پریذائیڈنگ افسر کے طور پر تعینات کیا گیا ہے۔

ایوان میں کل ایک سوچھیاسٹھ ارکان ہیں جن میں ترانوے پپلزپارٹی، اکاون متحدہ قومی مومنٹ تین نیشنل پپلزپارٹی، دو عوامی نیشنل پارٹی، قاف لیگ کے نو، مسلم لیگ فنکشنل کے آٹھ شامل ہیں جن میں سے امکان ہے کہ گیارہ ارکان انتخابات میں حصہ نہیں لیں گے۔

قاف لیگ کے نو ارکان میں تین فارورڈ بلاک میں شامل ہوگئے ہیں جبکہ دو مزید ارکان نے آصف زرداری کی حمایت کا اعلان کیا ہے اور اس طرح سندھ اسمبلی میں فنکشنل اور قاف لیگ کے کل گیارہ ارکان انتخابات سے دور رہیں گے۔

سندھ اسمبلی میں اس بات کا امکان انتہائی کم ہے کہ آصف زرداری کی مخالفت میں ووٹ ڈالے جائیں۔