عبدالحئی کاکڑ بی بی سی اردو ڈاٹ کام، پشاور

	چینی انجینئروں کو محفوظ مقام پر پہنچا دیا گیا ہے:ترجمان طالبان

ان انجینئروں کو تین دن قبل ضلع دیر کے خال کے علاقے تور منگ میں ایک نجی موبائل کمپنی کے ٹاور کی مرمت کے بعد واپسی پر محافظ اور ڈرائیور سمیت اغواء کر لیا گیا تھا۔

سوات میں طالبان کے ترجمان مسلم خان نے چینی انجینئروں اور ان کے ساتھیوں کے اغواء کی ذمہ داری قبول کرتے ہوئے بی بی سی کو بتایا کہ انہیں طالبان نے محفوظ مقام تک پہنچا دیا ہے اور ان کے مستقبل کا فیصلہ طالبان کی مرکزی شورٰی کرے گی۔

انہوں نے ان چینی انجینئروں کے اغواء کی وجہ بتاتے ہوئے الزام لگایا کہ گزشتہ سال جامعہ حفصہ کے خلاف ہونے والی کارروائی چین کے دباؤ کے نتیجے میں کی گئی تھی۔ ان کے بقول جامعہ حفصہ کے طلباء کی جانب سے اسلام آباد سے چینی شہریوں کی اغواء کے بعد ہی لال مسجد کےخلاف کارروائی کی گئی۔

یاد رہے کہ دو روز قبل ضلع دیر میں حکام نے کہا تھا کہ مغویان کی تلاش کے لیے بڑے پیمانے پر سرچ آپریشن شروع کر دیا گیا ہے اور واقعہ کی تفتیش کے لیے تین ٹیمیں مقرر کی گئی ہیں۔ پولیس حکام کا یہ بھی کہنا تھا کہ چینی انجینئروں نے دیر آمد سے قبل مقامی انتظامیہ کو کوئی اطلاع نہیں دی تھی۔