ہارون رشید بی بی سی اردو ڈاٹ کام، اسلام آباد

	ضلع سوات میں مقامی عسکریت پسندوں نے کسی ایسی جنگ بندی کو مسترد کر دیا تھا

قبائلی علاقوں کے مقامی طالبان نے رمضان کی آمد پر اس جنگ بندی کا خیرمقدم کیا ہے تاہم صوبہ سرحد کے ضلع سوات میں مقامی عسکریت پسندوں نے کسی ایسی جنگ بندی کو مسترد کر دیا تھا۔

مشیر داخلہ رحمان ملک نے گزشتہ دنوں لاہور میں رمضان کو وجہ بتا کر باجوڑ میں جنگ بندی کا اعلان کیا تھا۔انہوں نے کہا کہ اس کی ایک وجہ جنگ سے متاثرہ افراد کی گھروں کو واپسی کو یقینی بنانا ہے۔

سرکاری اعداوشمار کے مطابق پانچ لاکھ افراد نے نقل مکانی کی جن میں سے تین لاکھ کا اندراج ہوسکا ہے۔ اطلاعات ہیں کہ پناہ گزینوں کی اکثریت نے عارضی طور پر واپسی سے انکار کیا ہے۔ یہ پناہ گزین مختلف شہروں میں عارضی کیمپوں میں رہ رہے ہیں۔

درہ آدم خیل سے آج بھی اطلاعات ہیں کہ سکیورٹی فورسز نے چوتھے روز بھی اپنی کارروائی جاری رکھی ہوئی ہے۔ درہ کے لوگوں نے حکومت سے رمضان کے پیش نظر لڑائی روکنے کی اپیل کی ہے۔

قبائلی علاقے کرم سے بھی فریقین کے درمیان لڑائی جاری رہنے کی اطلاعات ہیں۔ حکومت نے اب تک طوری اور بنگش قبائل کے درمیان اس لڑائی کو روکنے کے لیے طاقت کے استعمال سے گریز کیا ہے

باجوڑ میں مقامی طالبان پہلے ہی جنگ بندی کا اعلان کر چکے تھے۔ تاہم وزیرستان میں میزائل حملوں اور درہ آدم خیل اور سوات میں جاری کارروائیوں کی وجہ سے مبصرین کے خیال میں یہ جنگ بندی کچھ زیادہ نہ چل پائے گی اور صدارتی انتخابات کے بعد لڑائی دوبارہ چھڑ سکتی ہے۔

حکومت پہلے ہی واضع کر چکی ہے کہ جنگ بندی کے دوران شدت پسندوں کی جانب سے ایک گولی کا جواب وہ دس گولیوں سے دیں گے۔

سوات میں شدت پسندوں کے ترجمان مسلم خان نے حکومتی جنگ بندی کی پیشکش مسترد کر دی تھی۔ ان کا کہنا ہے کہ ہر ماہ مقدس ہے لہذا ایسی کسی جنگ بندی کا جواز نہیں بنتا۔

قبائلی علاقے کرم سے بھی فریقین کے درمیان لڑائی جاری رہنے کی اطلاعات ہیں۔ حکومت نے اب تک طوری اور بنگش قبائل کے درمیان اس لڑائی کو روکنے کے لیے طاقت کے استعمال سے گریز کیا ہے۔