عزیزاللہ خان بی بی سی اردو ڈاٹ کام، کوئٹہ

	عبدالصمد لاسی اکبر بگٹی کی ہلاکت کے وقت ڈی سی او ڈیرہ بگٹی تھے

لسبیلہ میں وندر کے علاقے سے پولیس اہلکاروں نے بتایا ہے کہ عبدالصمد لاسی اپنے محافظوں کے ہمراہ حب شہر میں سسی پنوں کے علاقے میں پہاڑوں کی جانب تین گاڑیوں میں فرار ہو گئے ہیں۔

اطلاعات ہیں کہ پولیس بدھ کو عبدالصمد لاسی کو گرفتار کرنے ان کی آبائی رہائشگاہ پہنچی ہی تھی کہ عبدالصمد لاسی کے محافظوں نے پولیس پر فائرنگ کی ہے جس کے بعد پولیس نے جوابی کارروائی کی ہے لیکن کسی قسم کے جانی نقصان کی اطلاع نہیں ہے۔

پولیس زرائع نے بتایا ہے کہ عبدالصمد لاسی کی گرفتاری کے احکامات کوئٹہ سے اعلٰی پولیس حکام نے جاری کیے ہیں لیکن کوئٹہ میں اعلی پولیس افسران نے اس کی تصدیق نہیں کی ہے۔

یہ معلوم نہیں ہو سکا ہے کہ پولیس کارروائی کس سلسلے میں کی گئی ہے ۔ اس بارے میں لسبیلہ پولیس کے حکام سے رابطے کی بارہا کوشش کی گئی لیکن ان سے رابطہ نہیں ہو سکا۔

عبدلصمد لاسی کو تین سال پہلے غیر معمولی طور پر ترقی دے کر ڈیرہ بگٹی میں ضلعی رابطہ افسر تعینات کر کے اس علاقے میں فوجی آپریشن شروع کیا گیا تھا اور نواب اکبر بگٹی کے خلاف ہونے والی کارروائی میں بھی عبدالصمد لاسی پیش پیش رہے تھے۔ تاہم گزشتہ سال انہیں افسر بکارِ خاص بنا دیا گیا تھا اور ان دنوں وہ اپنے آبائی شہر میں تھے۔