عزیزاللہ خان بی بی سی اردو ڈاٹ کام، کوئٹہ

	پولیس نے بتایا ہے کہ ہلاک ہونے والے پانچوں افراد سرکاری ملازمین ہیں۔(فائل فوٹو)

چھتر کا علاقہ ضلع نصیر آباد اور ڈیرہ بگٹی کی سرحد کے قریب واقع ہے۔

پولیس اہلکاروں نے بتایا ہے کہ آج صبح کھیتی باڑی کے لیے جانے والے ایک مقامی شخص نے اطلاع دی ہے کہ ویرانے میں پانچ لاشیں پڑی ہوئی ہیں۔ ان افراد کی شناخت کے لیے پولیس روانہ کر دی گئی ہے اور ابتدائی اطلاعات کے مطابق پولیس نے بتایا ہے کہ ہلاک ہونے والے پانچوں افراد سرکاری ملازمین ہیں۔

مقامی لوگوں نے بتایا ہے کہ کوئی تین ہفتے پہلے تحصیل میونسپل افسر، ایک سب انجینیئر اور دیگر ملازمین کو نامعلوم افراد نے علاقے کے دورے کے دوران اغوا کیا تھا اور یہ لاشیں انہی ملازمین کی ہیں۔

دریں اثنا اپنے آپ کو کالعدم تنظیم بلوچ ریپبلکن آرمی کا ترجمان ظاہر کرنے والے سرباز بلوچ نامی شخص نے ٹیلیفون پر اس حملے کی ذمہ داری قبول کی ہے اور کہا ہے کہ یہ سرکاری اہلکار بلوچ مزاحمت کاروں کی مخبری کیا کرتے تھے۔

سرباز بلوچ کے مطابق گزشتہ روز ڈیرہ بگٹی میں لنجو صغاری کے علاقے میں کچھی کینال پر کام کرنے والے ایک بلڈوزر کو دھماکے سے اڑایا گیا تھا اور کل رات سوئی میں راکٹ داغے گئے ہیں۔