دلاور خان وزیر بی بی سی اردو ڈاٹ کام ، اسلام آباد

	شاہراہ کے بند ہونے پر محسود اور وزیر قبائل دونوں کے لیے مشکلات پیدا ہوتی ہیں

بیت اللہ گروپ کا الزام ہے کہ قبائلی سردار خیر محمد کو طالبان کے کسی دوسرے گروپ نے ہلاک کیا ہے۔

مقامی پولیٹکل انتظامیہ کا کہنا ہے کہ گزشتہ شام وانا سے کوئی پچیس کلومیٹر دور مشرق کی جانب مدیجان کے علاقے میں ایک قبائلی سردار ملک خیر محمد کی لاش ملی تھی جو لاپتہ تھے۔

مقامی انتظامیہ کے مطابق خیر محمد کا تعلق محسود قبائل کے ذیلی شاخ عبدالرحمن خیل قبیلے سے تھا جو تحریک طالبان پاکستان بیت اللہ گروپ کے حامی قبائلی سردار تھے۔

مقامی انتظامیہ کا کہنا ہے کہ طالبان حامی قبائلی سردار کی ہلاکت کے بعد بیت اللہ گروپ کے مقامی طالبان نے وانا-ٹانک شاہرہ کو مدیجان کے مقام پر ہر قسم کے ٹریفک کے لیے بند کردیا ہے۔دونوں طرف سینکڑوں گاڑیاں کھڑی ہیں جن میں سے زیادہ تر پر سبزیاں اور میوے لدے ہیں۔

وانا میں موجود ایک مقامی صحافی حفیظ اللہ نے بی بی سی کو بتایا کہ درگی کے مقام پر سیب اور ٹماٹر کی سینکڑوں گاڑیاں پھنس گئی ہیں۔انہوں نے کہا کہ اگر حکومت ایک دن کے اندر اندر راستہ کھولنے میں ناکام رہی تو اندیشہ ہے کہ کروڑں کا مال ضائع ہوجائے گا۔

یاد رہے کہ جنوبی وزیرستان کو پاکستان کے دوسرے شہروں سے ملانے والی اہم شاہراہ کو اس سے پہلے بھی کئی بار فوج نے خود بھی بند کیا تھا۔اس شاہراہ کے بند ہونے پر محسود اور وزیر قبائل دونوں کے لیے مشکلات پیدا ہوتی ہیں۔دو ہزار چار میں حکومت نے وزیر قبائل پر اقتصادی پابندی لگانے کے بعد وانا ٹانک شاہراہ کو تین مہینے کے لیے بند کیا تھا۔