ہارون رشید بی بی سی اردو ڈاٹ کام، اسلام آباد

	نیئر زیدی امریکی ریاست ورجینا میں گزشتہ بیس برسوں سے مقیم ہیں

وزارت خارجہ کے ترجمان محمد صادق نے یہاں ہفتہ وار بریفنگ میں بتایا کہ ان کے علم میں یہ بات آج کے اخبارات کے توسط سے آئی ہے جس میں نیئر زیدی کی اہلیہ کے حوالے سے کہا گیا ہے کہ وہ تین ماہ سے امریکی تحقیقاتی اداروں کی تحویل میں ہیں۔

ان کا کہنا تھا کہ وہ آج ذاتی طور پر نیئر زیدی کے اہل خانہ سے رابطے کی کوشش کریں گے تاکہ اصل حقائق معلوم ہوں سکیں۔

نیئر زیدی کی اہلیہ مس شاہین کے حوالے سے شائع خبر میں کہا گیا ہے کہ وہ مارچ سے امریکی حکام کی حراست میں ہیں۔ نیئر زیدی امریکی ریاست ورجینا میں گزشتہ بیس برسوں سے مقیم ہیں۔ وہ ایک نجی ٹی وی چینل جیو کے بیور چیف ہونے کے علاوہ کئی پاکستانی اخبارات اور رسائل کے لیے باقاعدگی سے کالم بھی لکھتے رہے ہیں۔

انہیں اطلاعات کے مطابق ریاست اوہایو سے حراست میں لیا تھا۔ اس بارے میں ان کی اہلیہ نے میڈیا کو ایف بی آئی اور وزارت انصاف سے خط وکتابت بھی دکھائے ہیں۔

ترجمان وزارت خارجہ کہنا تھا: ’میرے علم میں یہ بات آج صبح اخبارات کے ذریعے پہنچی ہے۔ ہم اپنے اختیار میں جو بھی ہوا اس خاندان کی مدد کے لیے کریں گے تاہم ابھی ہمیں زیادہ معلومات حاصل نہیں ہیں۔ ہمیں یہ بھی معلوم نہیں کہ آیا یہ خبر درست ہے یا نہیں کیونکہ یہ آج پہلی مرتبہ شائع ہوئی ہے۔‘

اگر یہ اطلاعات درست ہیں تو یہ پہلی مرتبہ ہے کہ امریکہ میں مقیم کسی پاکستانی صحافی کو حراست میں لیا گیا ہے۔ یہ خبر ایک ایسے وقت سامنے آئی ہے جب وزیر اعظم سید یوسف رضا گیلانی امریکی صدر سے آج ملاقات کر رہے ہیں۔